“Diplomacia e pandave” rikthehet në SHBA/ Dy panda mbërrijnë në kopshtin zoologjik të Atlantës

6-vjeçari Ping Ping dhe 5-vjeçarja Fu Shuang udhëtuan rreth 8 mijë milje nga Kina drejt SHBA-së. Ata u transportuan me një avion, të shoqëruar me bambu të freskët, ujë dhe ushqimet e tyre të preferuara.

Përpara udhëtimit, pandat iu nënshtruan një periudhe karantine dhe u trajnuan për të qëndruar në arkat e transportit dhe për t’u përshtatur me zhurmat e udhëtimit.

Megjithatë, vizitorët nuk do të mund t’i shohin menjëherë. Ping Ping dhe Fu Shuang do të qëndrojnë rreth një muaj në karantinë, përpara se të prezantohen me publikun.

Ardhja e tyre në Atlanta ka edhe një rëndësi për programet e ruajtjes së pandave. Kafshët konsiderohen ende të cenueshme dhe riprodhimi në robëri është veçanërisht i vështirë, pasi femrat janë pjellore vetëm për një periudhë shumë të shkurtër çdo vit.

Ping Ping dhe Fu Shuang janë përzgjedhur për moshën, shëndetin, karakteristikat gjenetike dhe personalitetin e tyre, me shpresën se do të çiftëzohen natyrshëm.

Dy pandat janë gjithashtu pjesë e asaj që njihet si “diplomacia e pandave”, përmes së cilës Kina ka përdorur prej dekadash huazimin e pandave si një formë të marrëdhënieve diplomatike me vende të tjera.

Sipas marrëveshjes, pandat dhe pasardhësit e tyre do të mbeten pronë e Kinës dhe do të kthehen atje në të ardhmen.

Top Channel