Banorët e Rrjollit, përmes përfaqësueses së tyre Luçiana Koka, bëjnë me dije se Gjykata e Posaçme Kundër Korrupsionit dhe Krimit të Organizuar ka pranuar ankimimin e tyre pas vendimit të SPAK për mosfillimin e hetimeve lidhur me kallëzimin penal të depozituar prej tyre.
Sipas banorëve, gjyqtarja Flojera Davidhi ka urdhëruar SPAK të regjistrojë procedimin penal dhe të kryejë hetime mbi pretendimet e ngritura në kallëzim.
Banorët kanë pretenduar për parregullsi që lidhen me dokumentacionin e pronësisë dhe procedurat e ndjekura për projektin “Baks Bay”, duke deklaruar se projekti po ndërtohet në një territor që, sipas tyre, është përfituar në mënyrë të paligjshme.
Në kallëzimin e tyre, banorët kanë ngritur pretendime për falsifikim dokumentesh ndaj Fatmir Shpellzës, ndërsa ndaj kompanisë “Gener 2” kanë ngritur pretendime për ndërtim të paligjshëm.
Top Channel
