Zgjedhjet në Rusi, fitore e pritshme për partinë e Putinit/ CNN: Tani vëmendja te hapat e Kremlinit

Sipas CNN, opozita reale politike ndaj Kremlinit është dobësuar ndjeshëm vitet e fundit, ndërsa partia Yabloko, e cila kishte bërë thirrje për përfundimin e luftës, nuk u lejua të merrte pjesë në zgjedhje.

Presidenti Putin e kishte paraqitur votimin si një dëshmi të unitetit kombëtar dhe të mbështetjes për forcat ruse që luftojnë në Ukrainë.

CNN shkruan se organizimi i zgjedhjeve në të gjithë vendin, edhe në kushtet e luftës, i shërben Kremlinit për të krijuar një imazh normaliteti, ndërsa në të njëjtën kohë presioni nga lufta po ndihet gjithnjë e më shumë në shoqërinë dhe ekonominë ruse.

Një nga shqetësimet kryesore është mundësia e një mobilizimi të ri ushtarak. Në vitin 2022, mobilizimi i pjesshëm çoi në thirrjen e rreth 300 mijë burrave nën armë dhe shkaktoi një largim masiv të rusëve nga vendi. Putin ka mohuar se ekziston një plan për një mobilizim të ri, duke i cilësuar këto spekulime si “absurde”.

Ndërkohë, zgjedhjet kanë sjellë në politikë edhe 49 veteranë të luftës në Ukrainë. Sipas analizës së CNN, përfshirja e tyre mund të përdoret nga Kremlini për të nxitur rekrutimin vullnetar në ushtri.

Në këtë situatë, vëmendja tashmë është te hapat e ardhshëm të Kremlinit: nëse do të ketë një shtytje të re ushtarake në Ukrainë, masa të reja ekonomike e sociale apo një përshkallëzim të kontrolleve brenda vendit.

Top Channel