Kishte planifikuar një sulm me bombë në Kapitol/ FBI arreston 35-vjeçaren e maskuar në Nju Jork, dyshohet se ishte frymëzuar nga ISIS

Sipas autoriteteve amerikane, Bowie u arrestua të mërkurën dhe të enjten u paraqit për herë të parë në Gjykatën Federale. Ajo akuzohet për përpjekje për t’i ofruar mbështetje materiale një organizate të huaj terroriste të përcaktuar, ISIS.

Sipas aktakuzës, Bowie kishte shprehur besnikëri ndaj ISIS-it dhe kishte nisur të planifikonte sulmin gjatë muajit korrik. Ajo dyshohet se kishte kryer disa herë vëzhgime pranë Kapitolit dhe kishte fotografuar ndërtesën dhe zonat përreth saj.

Hetuesit thonë se ajo kishte blerë materiale që besonte se mund të përdoreshin për një bombë dhe kishte kërkuar ndihmë për realizimin e sulmit. Në kuadër të një operacioni të fshehtë, agjentë të FBI-së u paraqitën si persona të lidhur me ISIS-in dhe komunikuan me të për planin.

Autoritetet amerikane deklaruan se agjentët i dorëzuan asaj një pajisje shpërthyese dhe një armë joaktive, përpara se ta arrestonin.

Sipas hetimeve, objektivi i saj ishte të sulmonte Kapitolin ndërsa senatorët e shtetit ndodheshin në ndërtesë. Autoritetet thonë se Bowie kishte diskutuar gjithashtu për objektiva të tjerë të mundshëm në të ardhmen.

FBI-ja publikoi edhe fotografi nga hetimi, ku e dyshuara shfaqet duke kryer vëzhgime pranë Kapitolit. Në një prej tyre, ajo identifikohet nga autoritetet si personi i veshur me të zeza që po fotografonte ndërtesën.

Autoritetet amerikane e cilësuan planin si serioz dhe të rrezikshëm, por theksuan se ai u zbulua dhe u neutralizua përpara se të realizohej.

Top Channel