Një zjarr ka përfshirë një shtypshkronjë në Gjirokastër, por fatmirësisht nuk raportohet për persona të lënduar.
Siç raporton korrespondentja e Top Channel Entjola Budo, bëhet fjalë për shtypshkronjën “Argjiro”, e cila ndodhet në aksin Gjirokastër–Tepelenë, pranë zonës së Viroit.
Në orën 09:10, Drejtoria e MZSH-së Gjirokastër u njoftua për rënien e një zjarri në një biznes në afërsi të Liqenit të Viroit.
Menjëherë drejt vendngjarjes u nisën dy automjete zjarrfikëse. Me mbërritjen në vend u konstatua se zjarri kishte rënë në një ambient që përdorej për mbajtjen e kompresorëve të ajrit.
Shërbimet zjarrfikëse ndërhynë menjëherë, duke përdorur fikëse me pluhur dhe ujë. Zjarri u kap në kohë dhe u neutralizua pa marrë përmasa, duke shmangur përhapjen në ambientet e tjera të biznesit.
Nga zjarri pati vetëm dëme të vogla materiale dhe nuk raportohet për persona të lënduar.
Shkaqet e rënies së zjarrit po hetohen nga organet kompetente.
Top Channel
