Kriza politike në Ukrainë/ Dikur aleat me Zelenskyn, sot e sfidon, ish-Ministri i Mbrojtjes: Duhen zgjedhje, edhe në mes të luftës

Kjo thirrje vjen pasi autoritetet antikorrupsion po hetojnë një rast që dyshohet se përfshin ligjvënës dhe zyrtarë të lartë presidencialë.

Fedorov, një ish-aleat i ngushtë i Zelensky-t dhe një nga politikanët më të njohur në vend, bëri thirrje të martën për rivendosjen e një “ procesi demokratik plotësisht funksional ” edhe në kushtet e një lufte të zgjatur.

“Demokracia nuk mund të mbahet peng nga Rusia. Ne po luftojmë pikërisht sepse duam të mbetemi një shtet i lirë evropian”, tha ai në një mesazh video nëntë minutësh.

Kjo është sfida më e drejtpërdrejtë politike ndaj Zelensky-t që nga fillimi i pushtimit të plotë rus në vitin 2022. Fedorov argumentoi se Ukraina po përballet me një “ krizë sistemike të qeverisjes” dhe kritikoi korrupsionin e kohës së luftës, por nuk bëri akuza specifike kundër presidentit apo zyrtarëve të tjerë.

Polemika ka fituar peshë të veçantë pas shkarkimit të fundit të Fedorov nga Ministria e Mbrojtjes. 35-vjeçari, i cili kishte shërbyer edhe si Ministër i Transformimit Dixhital dhe ishte një mbështetës kryesor i përdorimit të dronëve në luftë, mori drejtimin e Ministrisë së Mbrojtjes në janar. Nën udhëheqjen e tij, përdorimi i të dhënave, statistikave dhe sistemeve të automatizuara në planifikimin e operacioneve ushtarake u promovua më tej.

Megjithatë, popullariteti i tij në rritje e solli atë në konflikt me udhëheqësit e lartë ushtarakë, përfshirë shefin e atëhershëm të forcave të armatosura, gjeneralin Oleksandr Shirsky, dhe figura të fuqishme në industrinë e mbrojtjes, ndërsa ai përpiqej të reformonte sistemin e prokurimit dhe të luftonte korrupsionin . Zelensky e shkarkoi atë më 15 korrik, vetëm gjashtë muaj pasi mori detyrën.

Shkarkimi i Fedorov shkaktoi demonstrata të rralla, për periudhën e luftës, në Kiev dhe qytete të tjera, kryesisht midis ukrainasve të rinj. Protestat vazhduan, teksa protestuesit kërkonin kthimin e tij në Ministrinë e Mbrojtjes dhe shkarkimin e Shirskit. Edhe një muaj pas shkarkimit të tij, mijëra njerëz morën pjesë në një demonstratë në Kiev, duke brohoritur slogane të tilla si “Populli është pushteti” dhe ” Korrupsioni vret”.

Aktivistët brohorasin slogane gjatë një tubimi proteste që dënon vendimin e Presidentit Volodymyr Zelensky për të shkarkuar Ministrin e Mbrojtjes Mykhailo Fedorov.

Fedorov, ndryshe nga kundërshtarët e tjerë të mundshëm politikë të Zelensky-t, refuzoi të merrte një pozicion tjetër qeveritar pas shkarkimit të tij, duke deklaruar se do të pranonte vetëm rikthimin e tij në Ministrinë e Mbrojtjes.

Ndërkohë, autoritetet ukrainase kundër korrupsionit po i shtojnë hetimet e tyre. NABU dhe SAPO njoftuan se kishin hapur një hetim ndaj ligjvënësve dhe “zyrtarëve të lartë” të paidentifikuar në zyrën e Zelensky-t, pa dhënë detaje të mëtejshme. Njoftimi erdhi disa orë para një votimi vendimtar në parlament për emërimin e Ministrit të ri të Mbrojtjes, Yevgeny Khmara.

Ndërkohë, Zelensky shkarkoi të mërkurën zëvendëskryetaren e administratës presidenciale, Iryna Mudra, sipas një dekreti të publikuar në faqen zyrtare të internetit të presidencës ukrainase. Nuk u dha asnjë arsye për shkarkimin e saj dhe nuk ka konfirmim zyrtar se vendimi lidhet me rastin e korrupsionit. Kjo e fundit u arrestua më pas.

Më herët gjatë ditës, autoritetet antikorrupsion njoftuan se kishin zbuluar një grup që dyshohet se ishte i përfshirë në pastrim parash, ku ata thanë se përfshihej edhe një zyrtar i lartë presidencial.

Presioni politik mbi Zelenskyn po intensifikohet në shumë fronte, pasi diskutimi për mbajtjen e zgjedhjeve gjatë kohës së luftës përkon me protesta, mosmarrëveshje të brendshme dhe hetime të reja për korrupsion që prekin rrethin e brendshëm të presidencës. Pavarësisht thashethemeve për zgjedhje këtë vit, deri më tani nuk ka pasur ndonjë zhvillim konkret në këtë drejtim.

Top Channel