Nga arrestimi në Dubai te ekstradimi në Dublin, bosi i kartelit mbërrin në Irlandë/ Përballet me akuza për krimi të organizuar

Avioni qeveritar irlandez që transportonte 49-vjeçarin është ulur në Casement Aerodrome në Baldonnell, në jugperëndim të Dublinit, në kuadër të një operacioni të madh sigurie.

Kinahan ishte arrestuar në Emiratet e Bashkuara Arabe në prill dhe ekstradimi i tij drejt Irlandës është shoqëruar me masa të forta sigurie. Shërbimi irlandez i burgjeve kishte blerë paraprakisht një automjet të blinduar dhe rezistent ndaj shpërthimeve për transportin e tij, ndërsa janë raportuar edhe përmirësime të sigurisë në burgun e sigurisë së lartë Portlaoise.

Sipas Agjencisë Kombëtare të Krimit të Mbretërisë së Bashkuar, karteli Kinahan ka qenë i përfshirë për më shumë se dy dekada në trafikimin e sasive të mëdha të drogës dhe armëve në vende të ndryshme të botës.

Kinahan pritet të akuzohet zyrtarisht në orët në vijim dhe më pas të përballet me Gjykatën Speciale Penale të Irlandës, një gjykatë e përbërë nga tre gjyqtarë që merret me çështje të rënda kriminale dhe raste të krimit të organizuar.

Autoritetet irlandeze kanë marrë masa të jashtëzakonshme për transferimin e tij, për shkak të profilit të lartë të çështjes dhe rrezikut të mundshëm të sigurisë.

Kryeministri irlandez Micheál Martin ka vlerësuar bashkëpunimin mes autoriteteve irlandeze dhe atyre të Emirateve të Bashkuara Arabe në luftën kundër krimit të organizuar ndërkombëtar.

Martin ka shmangur komentet mbi çështjen konkrete, duke argumentuar se nuk dëshiron të ndikojë në procesin e drejtësisë, por ka theksuar se policia irlandeze meriton vlerësim për përpjekjet e saj të vazhdueshme kundër krimit të organizuar.

Ndërkohë, avokati i Kinahan ka mohuar më herët pretendimet se klienti i tij është drejtues i një organizate kriminale. Përgjegjësia e tij për akuzat që mund t’i ngrihen do të përcaktohet nga procesi gjyqësor.

Top Channel