Akuzohet për plagjiaturë dhe pasaktësi në kualifikimet e tij akademike, jep dorëheqjen profesori i Kembrixhit

Vendimi vjen pasi Universiteti i Kembrixhit njoftoi se kishte nisur një hetim të ri mbi profesorin, pas informacioneve të reja lidhur me kualifikimet akademike.

Arday, i cili në vitin 2023 u bë profesori më i ri me ngjyrë në historinë e Universitetit të Kembrixhit, ka pranuar se në punën e tij akademike ka pasur gabime, por ka mohuar kategorikisht se ka mashtruar.

Ai deklaroi se prej kohësh ka qenë objekt i një fushate të vazhdueshme sulmesh personale dhe vëmendjeje të tepruar publike.

Në deklaratën e tij, Arday tha se emërimi në Kembrixhi ishte privilegji më i madh profesional i jetës së tij, por shtoi se kostoja personale e kësaj situate ishte bërë shumë e rëndë.

Sipas tij, largimi nuk duhet të interpretohet si humbje besimi ndaj kërkimit shkencor apo ndaj vlerave të universitetit, por si mënyra e vetme për t’i dhënë fund kësaj periudhe të vështirë.

Ai falënderoi studentët dhe kolegët për mbështetjen, duke theksuar se ka nevojë për kohë për t’u rikuperuar dhe se planifikon t’i rikthehet punës akademike në të ardhmen.

Kontestimet ndaj Arday nisën pasi studiuesi amerikan Nathan Cofnas publikoi pretendime se pjesë të tezës së doktoraturës së profesorit përmbanin fragmente të kopjuara nga burime të tjera me ndryshime minimale.

Universiteti Liverpool John Moores, i cili i kishte dhënë doktoraturën në vitin 2015, kishte hetuar më parë akuza të ngjashme, por nuk gjeti prova të mjaftueshme për të mbështetur pretendimet për plagjiaturë.

Në një intervistë të fundit, Arday pranoi se disa gabime në punimet e tij të hershme janë reale dhe tha se mban përgjegjësi për to, por këmbënguli se nuk është gënjeshtar.

Ai pretendoi se prej momentit kur u emërua në Kembrixhi ka qenë objekt i një fushate të organizuar për ta larguar nga posti, duke sugjeruar se sulmet ndaj tij kanë pasur edhe motive racore dhe lidhen me debatet mbi politikat e diversitetit, barazisë dhe përfshirjes në universitete.

Profesori shpjegoi gjithashtu se autizmi ka ndikuar në mënyrën si mësonte dhe përpunonte informacionin në vitet e para të karrierës së tij akademike, gjë që, sipas tij, mund të ketë çuar në disa gabime në citime dhe referenca.

Përveç akuzave për plagjiaturë, Arday është vënë në pikëpyetje edhe për disa pretendime personale, përfshirë sfida sportive dhe shumat e mëdha të mbledhura për bamirësi.

Ai ka sqaruar se fondet janë mbledhur gjatë një periudhe 20-vjeçare me ndihmën e shumë personave të tjerë, ndërsa disa nga rekordet sportive janë raportuar gabimisht në publik.

Ndërkohë, Universiteti i Kembrixhit konfirmoi se, përveç hetimit mbi kualifikimet e tij, po shqyrton edhe ankesa të tjera për sjellje të mundshme të pahijshme në kërkimin shkencor, në përputhje me rregulloret e institucionit. Edhe Kolegji Jesus, ku Arday ishte anëtar, ka nisur një procedurë të veçantë paralele me hetimin e universitetit.

Nga ana tjetër, shtëpia botuese Simon & Schuster, e cila pritet të publikojë autobiografinë e Arday këtë muaj, deklaroi se vazhdon ta mbështesë profesorin, duke vlerësuar profesionalizmin dhe integritetin e tij gjatë bashkëpunimit.

Disa profesorë kanë kritikuar universitetet elitare duke pretenduar se emërime të tilla janë nxitur nga dëshira për të promovuar diversitetin dhe për të përmirësuar imazhin publik, ndërsa të tjerë kanë kundërshtuar këtë argument, duke theksuar se akademikët me ngjyrë përballen me pengesa të shumta dhe nuk gëzojnë trajtim të privilegjuar në institucionet e arsimit të lartë.

Top Channel