Vrau 38-vjeçaren dhe ia fshehu trupin në valixhe/ Del para gjykatës në Athinë boksieri 26-vjeçar, akuzohet edhe për vjedhjen e mijëra eurove nga llogaria e viktimës

Sipas autoriteteve greke, Ahmadzai akuzohet gjithashtu se ka vjedhur mijëra euro nga llogaritë bankare të viktimës.

I shoqëruar nga dy efektivë të armatosur të policisë, 26-vjeçari mbërriti në kompleksin gjyqësor të Evelpidonit, ku u paraqit para gjykatës për të dhënë versionin e tij të ngjarjes.

Më herët, ai u kishte deklaruar hetuesve se e kishte gjetur Ross të pajetë në apartamentin e saj. Sipas dëshmisë së tij, ai më pas e futi trupin në një valixhe, e transportoi nëpër lagjen Kypseli të Athinës dhe e braktisi në një ndërtesë të pabanuar.

Avokati i tij, Christos Erdas, kërkoi shtyrjen e seancës, duke argumentuar se dosja e paraqitur nga prokuroria ishte e paplotë. Gjykata vendosi që Ahmadzai të paraqitet sërish të enjten në orën 11:00.

Sipas mediave britanike, Ahmadzai mbërriti në Greqi në vitin 2016, pasi kaloi përmes Pakistanit, Iranit dhe Turqisë. Ai kishte deklaruar se familja e tij ishte vrarë nga talebanët.

Në kampin e emigrantëve në Moria ai njohu Alaina Hall, një amerikane nga shteti i Xhorxhias, e cila punonte si vullnetare. Ahmadzai u konvertua në fenë e krishterë në vitin 2017 dhe çifti u martua në prill të vitit 2023.

Së bashku ata themeluan organizatën Love Every Nation, e cila ofronte ndihmë për refugjatët në Athinë. Çifti u bë prindër në prill të këtij viti.

Ahmadzai është gjithashtu boksier profesionist dhe në muajin mars fitoi titullin grek në kategorinë super të lehtë. Ai organizonte edhe kurse boksi për të mbledhur fonde për organizatën.

Sipas hetimeve, viktima Elisabeth-Jane Ross kishte njohje me çiftin përmes aktivitetit të organizatës dhe po qëndronte në një apartament të lidhur me OJQ-në, në të cilin dyshohet se Ahmadzai dhe bashkëshortja e tij kishin akses.

Top Channel