Një zjarr ka rënë sot në dy banesa në lagjen “Çlirim” në qytetin e Beratit.
Zjarri ka nisur fillimisht nga bahçet e këtyre dy shtëpive të pabanuara dhe më pas është përhapur me shpejtësi, i favorizuar nga temperaturat e larta dhe era e ngrohtë.
Korrespondenti i Top Channel, Bledar Korreshi, bën me dije se kanë qenë banorët ata që kanë njoftuar zjarrfikësit, të cilët kanë mbërritur në zonë me 3 mjete, ndërkohë që në ndihmë të tyre kanë mbërritur edhe forca të shumta policie.
Zjarri u përhap edhe drejt çatisë së një shtëpie monument kulture, por ndërhyrja në kohë e zjarrfikësve lokalizoi shpejt flakët, duke bërë të mundur shuarjen e zjarrit.
Forcat zjarrfikëse ndodhen ende në zonë për të monitoruar vatrat dhe për të shmangur shpërthimin sërish të zjarrit. Pranë zjarrit ka qenë edhe një mjet tip Ford, i cili u dëmtua në pjesën e përparme, por fatmirësisht u lëviz nga vendi. Sipas burimeve të zjarrfikësve në vendngjarje, zjarri dyshohet të ketë qenë i qëllimshëm.
Top Channel
