Mbi 1.500 emigrantë mbërrijnë me not nw brigjet spanjolle, 18 viktima. Meloni propozon pezullimin e Schengenit me Spanjën

Sipas autoriteteve lokale, vetëm gjatë 24 orëve të fundit janë nxjerrë nga deti trupat e 18 emigrantëve, ndërsa raportohet se disa persona të tjerë rezultojnë ende të zhdukur. Presidenti i Ceutës, Juan Jesús Vivas, deklaroi se rreth 2.000 emigrantë kanë hyrë në qytet gjatë dhjetë ditëve të fundit, duke kërkuar ndërhyrje urgjente nga qeveria spanjolle.

Spanja forcon masat e sigurisë

Qeveria spanjolle ka vendosur të dërgojë trupa shtesë ushtarake për të mbështetur Gardën Civile në kontrollin e kufirit. Kryeministri Pedro Sánchez deklaroi se ekzekutivi është angazhuar të marrë masa të menjëhershme për të rikthyer situatën nën kontroll.

Ministri i Brendshëm spanjoll, Fernando Grande-Marlaska, do të vizitojë Ceutën për të koordinuar masat emergjente dhe për të forcuar bashkëpunimin me autoritetet marokene në menaxhimin e flukseve migratore dhe përshpejtimin e procedurave të riatdhesimit.

Meloni: Gati të pezullojmë Schengenin me Spanjën

Zhvillimet në Ceuta kanë shkaktuar reagime edhe në Itali. Kryeministrja Giorgia Meloni deklaroi se qeveria italiane po shqyrton mundësinë e pezullimit të përkohshëm të zbatimit të marrëveshjes Schengen me Spanjën, duke argumentuar se emigracioni i paligjshëm përbën një kërcënim për sigurinë e kufijve evropianë.

“Këto pamje tregojnë edhe një herë se emigracioni i pakontrolluar është një sfidë serioze për Evropën. Italia është e gatshme të përdorë çdo instrument të nevojshëm për mbrojtjen e kufijve dhe të qytetarëve”, u shpreh Meloni.

Pas këtyre deklaratave, Ministria e Jashtme spanjolle thirri ambasadorin italian në Madrid për të kërkuar sqarime mbi qëndrimin e Romës.

Polemika mes Spanjës dhe Marokut

Sindikatat e policisë spanjolle kanë akuzuar autoritetet marokene se nuk po bëjnë mjaftueshëm për të ndaluar kalimet e paligjshme drejt Ceutës. Nga ana tjetër, Maroku i ka hedhur poshtë akuzat, duke fajësuar rrjetet kriminale të trafikimit të qenieve njerëzore për organizimin e kalimeve masive dhe duke theksuar se bashkëpunimi me Spanjën mbetet i mirë.

Sipas autoriteteve spanjolle, trafikantët po përfitojnë edhe nga një vendim i fundit i Gjykatës Supreme të Spanjës, i cili ka kufizuar praktikën e kthimeve të menjëhershme të emigrantëve në kufi, duke nxitur më shumë tentativa për kalim.

Një nga kufijtë më të ndjeshëm të Evropës

Ceuta është një territor spanjoll në brigjet e Afrikës Veriore dhe, së bashku me Melillën, përbën kufirin e vetëm tokësor mes Bashkimit Evropian dhe kontinentit afrikan. Për shkak të pozicionit të saj strategjik, enklava është prej vitesh një nga pikat kryesore të emigracionit të parregullt drejt Evropës.

Top Channel