Pse Evropa po digjet këtë verë? Temperaturat ekstreme dhe thatësira po ‘ushqejnë’ zjarret

Sipas ekspertëve, moti i nxehtë ka tharë bimësinë, duke e kthyer atë në një “kuti baruti”, ku edhe një shkëndijë e vogël mund të shkaktojë zjarre të mëdha. Situata është rënduar edhe nga dimri i lagësht, i cili favorizoi rritjen e bimësisë së re, duke shtuar sasinë e materialit që mund të digjet.

Të dhënat e Sistemit Evropian të Informacionit për Zjarret në Pyje (EFFIS) tregojnë se këtë vit është djegur më shumë sipërfaqe se mesatarja për të njëjtën periudhë të viteve të kaluara. Megjithatë, deri më 22 korrik, sipërfaqja e djegur në nivel kontinental mbetet pak më e ulët se ajo e vitit 2025, i cili konsiderohet si viti më i rëndë i regjistruar ndonjëherë për zjarret.

Situata më alarmante paraqitet në Francë. Vendi ka regjistruar mbi 300 zjarre që nga fillimi i vitit, më shumë se trefishi i mesatares vjetore prej 93 zjarresh.

Ekspertët lidhin përkeqësimin e situatës me krizën klimatike, e cila po sjell temperatura më të larta dhe periudha më të gjata thatësire. Këto kushte ulin ndjeshëm lagështinë në tokë dhe bimësi, duke rritur rrezikun që zjarret të përhapen me shpejtësi.

Sipas shërbimit meteorologjik francez Météo-France, lagështia e tokës në Francë është në nivelin më të ulët të regjistruar ndonjëherë për këtë periudhë të vitit, duke e bërë sezonin e zjarreve edhe më të rrezikshëm.

Top Channel