Pamje apokaliptike në Itali, breshëri sa një top tenisi/ Stuhia e fuqishme paralizon qarkullimin e makinave, dëme të shumta

Një nga situatat më kritike u regjistrua në autostradën A13 pranë Ferrarës, ku breshëri me përmasa deri në tre centimetra detyroi shoferët të ndalonin automjetet.

Dhjetëra makina pësuan dëmtime të rënda, me xhama të thyer dhe karroceri të shkatërruara, ndërsa autoritetet raportuan edhe persona të lënduar.

“Qielli u errësua papritur dhe më pas nisi breshëri. Më theu xhamin e përparmë. U detyrova të ndaloja dhe të mbuloja fytyrën”, rrëfeu një prej drejtuesve të automjeteve.

Stuhitë goditën gjithashtu rajonet e Lombardisë dhe Emilia-Romagnës. Në Milano, moti i keq detyroi evakuimin e rreth 80 mijë spektatorëve nga një koncert, ndërsa në Ravenna u rrëzuan mbi 100 pemë, u dëmtua çatia e një shkolle dhe u bllokuan për disa orë rrugë kryesore. Probleme u shënuan edhe në transportin hekurudhor dhe atë rrugor, me vonesa dhe anulime.

Sektori bujqësor ka pësuar goditje të rënda. Shoqatat e fermerëve raportojnë dëme të konsiderueshme në kultura si misri, soja, orizi, luledielli dhe pemishtet, ndërsa rrjetat mbrojtëse dhe infrastrukturat bujqësore janë shkatërruar. Sipas vlerësimeve paraprake, dëmet arrijnë në qindra miliona euro.

Brenda tre ditëve, në veri të Italisë janë regjistruar 192 stuhi të forta breshëri, me kokrra akulli që në disa zona kanë arritur deri në 10 centimetra diametër.

Organizatat e fermerëve kanë kërkuar shpalljen e gjendjes së jashtëzakonshme dhe mbështetje financiare nga Bashkimi Evropian.

Ndërkohë, në jug të vendit, temperaturat kanë mbetur mbi 40 gradë Celsius, duke favorizuar përhapjen e zjarreve në pyje dhe shkurre mesdhetare.