Një 21-vjeçar ka rënë në prangat e Policisë së Shkodrës, pasi në banesën e tij u gjetën katër armë zjarri dhe një sasi e konsiderueshme municioni.
Arrestimi u bë në kuadër të operacionit të koduar “Kalibri”, i zhvilluar nga shërbimet e Komisariatit të Policisë Shkodër, pas administrimit të shpejtë të informacioneve të siguruara në rrugë operative.
Në pranga u vu shtetasi R. M., 21 vjeç, banues në fshatin Trush.
Gjatë kontrollit të ushtruar në banesën e tij, efektivët e policisë sekuestruan një automatik, një pushkë, dy armë gjahu, si dhe një sasi të konsiderueshme municioni.
Të gjitha armët janë dërguar në Institutin e Policisë Shkencore për ekzaminime të mëtejshme, me qëllim verifikimin nëse janë përdorur në ngjarje kriminale.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, e cila po vijon hetimet për rastin.
Top Channel
