Tërmetet shkatërruese në Venezuelë, ekspertët: U regjistrua një fenomen i paprecedentë

Vlerësimet janë bërë nga profesori emeritus i Dinamikës, Tektonikës dhe Menaxhimit të Fatkeqësive Natyrore në Universitetin Kombëtar dhe Kapodistrian të Athinës, Efthimis Lekkas, njëherazi president i Organizatës Greke për Planifikimin dhe Mbrojtjen nga Tërmetet (OASP). Në mision mori pjesë edhe profesori emeritus i Teknologjisë së Tërmeteve, Panagiotis Karydis.

Misioni kishte si qëllim ofrimin e ndihmës shkencore, teknike, operacionale dhe humanitare për zonat e goditura nga katastrofa sizmike.

Më 24 qershor, Venezuela u godit nga dy tërmete shumë të fuqishme me magnitudë 7.2 dhe 7.5 ballë të shkallës Rihter, të regjistruara nga Shërbimi Gjeologjik i SHBA-së (USGS). Lëkundjet shkaktuan mijëra viktima dhe të plagosur, dëme të mëdha në infrastrukturë dhe ndërtesa, si dhe pasoja të rënda ekonomike e sociale.

Sipas ekspertëve grekë, një nga fenomenet më të pazakonta ishte fakti se dy tërmetet ndodhën vetëm 39 sekonda larg njëri-tjetrit. Lekkas theksoi se një interval kaq i shkurtër kohor mes dy tërmeteve kaq të fuqishëm nuk është dokumentuar kurrë më parë. Për krahasim, tërmetet binjake në Turqi në vitin 2023 ndodhën me një diferencë prej rreth gjashtë orësh.

Ekspertët konstatuan gjithashtu se çarja gjeologjike e San Sebastianit, e cila u aktivizua gjatë tërmeteve, ka një gjatësi prej të paktën 300 kilometrash dhe shtrihet përgjatë vijës bregdetare veriore të Venezuelës, duke ndarë pllakën tektonike të Amerikës së Jugut nga ajo e Karaibeve.

Një tjetër element që ka habitur studiuesit është fakti se zona pranë epiqendrës, ku ndodhen qytetet San Felipe, Morón dhe Valencia, nuk pësoi dëmtime të konsiderueshme. Edhe ndërtesat më të vjetra, të ndërtuara pa standarde moderne antisizmike, mbetën pothuajse të paprekura.

Në të kundërt, dëmet më të mëdha u regjistruan rreth 200 kilometra larg epiqendrës, në zonën bregdetare të La Guaira, Catia La Mar, Caraballeda dhe pranë aeroportit. Pikërisht aty u shembën qindra ndërtesa dhe u dëmtuan rëndë struktura banimi dhe objekte shumëkatëshe.

Sipas raportit të misionit, ndërtesat e larta të ndërtuara mbi depozita të lirshme bregdetare dhe lumore u prekën më rëndë për shkak të rezonancës mes valëve sizmike me periudhë të gjatë dhe karakteristikave të terrenit. Situata u përkeqësua nga fakti se lëkundjet e tërmetit të dytë nisën përpara se të përfundonin ato të të parit, duke e zgjatur ndjeshëm kohën e dridhjeve dhe duke rritur efektin shkatërrues mbi strukturat.

Ndërkohë, në kryeqytetin Karakas dëmet rezultuan shumë më të kufizuara. Përveç shembjes së rreth dhjetë ndërtesave të larta, pjesa më e madhe e qytetit nuk pësoi dëmtime serioze. Ekspertët besojnë se çarjet tektonike që kalojnë pranë Karakasit nuk u aktivizuan gjatë kësaj ngjarjeje sizmike.

Raporti vëren gjithashtu se në zonat shkëmbore dhe malore nuk u regjistruan shembje sistematike, ndërsa edhe lagjet me ndërtime informale dhe cilësi të dobët ndërtimi pësuan më pak dëme sesa pritej, për shkak të karakteristikave të ndryshme gjeologjike të terrenit.

Sipas të dhënave paraprake, dëmet ekonomike nga kjo katastrofë natyrore pritet të arrijnë rreth 5% të Prodhimit të Brendshëm Bruto të Venezuelës, duke e bërë atë një nga fatkeqësitë natyrore më të rënda që ka goditur vendin në dekadat e fundit.

Top Channel