Për herë të parë, pas 27 ditësh protestë para Kryeministrisë, qytetarët i drejtohen me një letër publike ambasadorëve dhe shefave të misioneve diplomatike të vendeve perëndimore të akredituara në Shqipëri.
Në letrën e firmosur nga anëtarët e grupit koordinues të protestës të siguruar nga gazetarja e Top Channel Kristi Gongo, emrat e të cilëve tashmë bëhen publikë, paraqiten pesë kërkesat e tyre, që nga dorëheqja e kryeministrit Edi Rama dhe gjithë klasës së vjetër politike, dhe krijimi i një qeverie tranzitore jopartiake me mandat 12-mujor.
Emrat e kordinatorëve dhe organizatorëve të protestës janë: Entela Koja, Arben Kola, Megan Balaj, Edviol Kulluri,
Luçjana Kokaj, Gentjan Progni, Gjon Ndoj, Etleva Merko, Everest Bardhi, Përparim Gjeka, Mevlan Mata,Ilir Xhemalaj dhe Marjen Rama.
Kërkesat e protestuesve u lexuan edhe në bulevardin “Dëshmorët e Kombit”, në ditën e 27 të tubimit. Mes thirrjeve për të vijuar betejën në shesh qytetarët kërkuan edhe anulimin e zgjedhjeve të ardhshme.
Letra e plotë:
GRUPI KOORDINUES I PROTESTËS
Tiranë, Shqipëri
26 qershor 2026
Drejtuar Shkëlqesive të Tyre,
Ambasadorëve dhe Shefave të Misioneve të vendeve perëndimore të akredituara në Republikën e Shqipërisë
Lënda: Njoftim mbi kërkesat e protestuesve
Shkëlqesi,
Në emër të Grupit Koordinues të Protestës, që përfaqëson një lëvizje të gjerë dhe paqësore qytetare, e cila ka mobilizuar qytetarët shqiptarë për njëzet e shtatë ditë radhazi, kemi nderin t’ju drejtohemi në frymën e transparencës, përgjegjësisë demokratike dhe respektit për vlerat që e bashkojnë vendin tonë me komunitetin euro-atlantik.
Shqipëria ndodhet në një moment përcaktues të zhvillimit të saj demokratik. Qytetarët e mbledhur në mënyrë paqësore në sheshet publike në mbarë vendin po ushtrojnë të drejtën e tyre themelore për shprehje qytetare, të udhëhequr nga një përkushtim i thellë ndaj shtetit të së drejtës, qeverisjes demokratike dhe dinjitetit njerëzor.
Në këtë kontekst, Grupi Koordinues i Protestës paraqet me respekt kërkesat e mëposhtme, të cilat pasqyrojnë vullnetin e popullit sovran:
1. Dorëheqjen e Kryeministrit dhe të Qeverisë aktuale, si një hap thelbësor dhe i panegociueshëm drejt rinovimit demokratik.
2. Krijimin e një qeverie teknike kalimtare, jopartiake, me mandat dymbëdhjetëmujor për të mbikëqyrur një proces reformash të besueshëm dhe të paanshëm.
3. Reformë tërësore kushtetuese, të mbështetur në parimin e barazisë së plotë të të gjithë qytetarëve shqiptarë përpara ligjit dhe që do të miratohet përmes referendumit popullor.
Kjo reformë duhet të përfshijë, ndër të tjera:
Reformën e Kodit Zgjedhor.
Reformën e legjislacionit që rregullon financimin e partive politike dhe organizatave të shoqërisë civile.
Vendosjen e kufizimit të mandateve për postin e Kryeministrit, duke kufizuar çdo individ në jo më shumë se dy mandate, të plota ose të pjesshme, gjatë karrierës së tij politike.
4. Korrigjime të menjëhershme ligjore, duke përfshirë:
Shfuqizimin e ndryshimeve në Ligjin për Zonat e Mbrojtura (Ligji nr. 21/2024).
Shfuqizimin e ndryshimeve në Ligjin për Trashëgiminë Kulturore.
Shfuqizimin e paketës ligjore të njohur si “Paketa e Maleve”.
Shfuqizimin e kuadrit ligjor që rregullon Investimet Strategjike.
5. Hartimin e një kontrate të re sociale ndërmjet qytetarëve dhe shtetit, e cila do të zhvillohet përmes konsultimeve të gjera me intelektualë të pavarur, ekspertë teknikë dhe përfaqësues jopartiakë të shoqërisë civile, në përputhje me propozimet e lëvizjes qytetare.
Këto kërkesa përfaqësojnë shprehjen e qartë dhe legjitime të një populli sovran të përkushtuar ndaj vlerave demokratike dhe shtetit të së drejtës. Ju bëjmë thirrje me respekt Shkëlqesisë Suaj të marrë në konsideratë seriozitetin dhe sinqeritetin e kësaj lëvizjeje qytetare dhe të mbështesë një zgjidhje paqësore, demokratike dhe gjithëpërfshirëse të krizës aktuale politike në Shqipëri.
Ne mbetemi në dispozicionin tuaj për çdo komunikim të mëtejshëm dhe besojmë në angazhimin tuaj të vazhdueshëm për demokracinë dhe dinjitetin njerëzor në Shqipëri, si pjesë e vlerave tona të përbashkëta evropiane.
Ju lutemi pranoni shprehjen e konsideratës sonë më të lartë.
Në emër të Grupit Koordinues të Protestës
Top Channel
