“Jam zgjedhur për t’i shërbyer vendit tim”/ Starmer drejt dorëheqjes, konfirmon Trump: Dështoi keq me emigracionin dhe energjinë

Në një postim në platformën Truth Social, Trump shkroi: “Keir Starmer do të japë dorëheqjen si kryeministër i Mbretërisë së Bashkuar”, pa dhënë detaje shtesë apo burime që mbështesin këtë pretendim.

Sipas agjencisë britanike PA, Trump nuk ka zhvilluar bisedime me Starmer që nga takimi i tyre në samitin e G7, i mbajtur më herët gjatë javës.

Në postimin e tij, presidenti amerikan kritikoi politikat e kryeministrit britanik, duke i cilësuar emigracionin dhe energjinë si dy fushat ku, sipas tij, Starmer ka dështuar.

“Ai dështoi keq në dy tema shumë të rëndësishme, emigracionin dhe energjinë”, shkroi Trump, duke përsëritur thirrjen e tij për zgjerimin e shfrytëzimit të burimeve të naftës dhe gazit në Detin e Veriut.

Ndërkohë, një zëdhënës i Downing Street iu referua deklaratës së fundit të Starmer, i cili të premten tha se mbetet i fokusuar në detyrat e tij si kryeministër.

“Ka ende shumë punë për të bërë dhe kjo është ajo ku jam i përqendruar. Për këtë jam zgjedhur, për t’i shërbyer vendit tim”, deklaroi Starmer.

Nga ana tjetër, sekretari britanik për Biznesin, Peter Kyle, tha për BBC se Starmer po reflekton mbi “realitetet politike” të momentit dhe do të veprojë në atë që konsideron interesin më të mirë të vendit.

Spekulimet për të ardhmen politike të Starmer janë shtuar ditët e fundit, ndërsa mediat britanike raportojnë se ai mund të njoftojë vendimin e tij që të hënën.

Top Channel