Lufta në Ukrainë përshkallëzohet: Sulm raketor ndaj Kievit, dronët ukrainas godasin një rafineri në Moskë

Administrata Ushtarake e Kievit dhe Forcat Ajrore të Ukrainës lëshuan një alarm ajror për disa rajone të vendit, duke paralajmëruar për rrezikun e përdorimit të mundshëm të armëve balistike nga Rusia.

Pak më vonë, kryeqyteti ukrainas, Kievi, u godit nga një sulm raketor. Sipas raportimeve lokale, u dëgjua zhurma e një rakete e ndjekur nga dy shpërthime të fuqishme.

Pas aktivizimit të alarmit, banorët dolën me shpejtësi në rrugë dhe u drejtuan drejt strehimoreve për t’u mbrojtur nga sulmet.

Përgjigjja e Ukrainës nuk vonoi. Sipas autoriteteve ruse, disa dronë ukrainas arritën të godasin një rafineri nafte në Moskë.

Lajmi u konfirmua nga kryebashkiaku i Moskës, Sergey Sobyanin, i cili deklaroi se mbrojtja ajrore ruse po përballej me një sulm të gjerë me dronë.

“Mbrojtja ajrore vazhdon të zmbrapsë një sulm në shkallë të gjerë. Disa dronë kanë arritur të godasin rafinerinë e Moskës. Po merren masa për të menaxhuar pasojat,” shkroi Sobyanin në aplikacionin e mesazheve Max.

Sipas tij, sistemet ruse të mbrojtjes ajrore kanë shkatërruar të paktën 52 dronë që po fluturonin drejt kryeqytetit rus.

Sulmet e fundit tregojnë se konflikti mes Rusisë dhe Ukrainës vazhdon të përshkallëzohet, ndërsa të dyja palët po intensifikojnë operacionet ushtarake.

Deri më tani nuk ka informacione zyrtare për viktima apo dëme të mëdha materiale nga sulmet e raportuara gjatë natës, ndërsa autoritetet në të dy vendet po vazhdojnë vlerësimin e situatës në terren.

Top Channel