Skandal në Milano/ Krijuan një grup në WhatsApp, shoferët e tramvajit shpërndanin foto intime të pasagjereve femra, bisedat seksiste zbuluan se…

Ata akuzohen se kanë krijuar një grup në WhatsApp për të shpërndarë dhe komentuar në mënyrë banale e seksiste imazhe të pasagjereve, të shkëputura direkt nga kamerat e sigurisë së mjeteve të transportit publik.

Prokurorët kanë vënë nën hetim zyrtar të paktën një punonjës të ATM-së (kompania e transportit publik të qytetit). Ai dyshohet se ka hyrë pa autorizim në sistemin informatik të kompanisë dhe ka hakuar kamerat e brendshme të sigurisë (CCTV) për të siguruar imazhe të pasagjereve femra.

Sipas raportimeve në mediat italiane, autoritetet kanë urdhëruar kontrolle në banesat e pesë punonjësve të tjerë meshkuj, duke u sekuestruar telefonat celularë dhe pajisje të tjera elektronike. Shoferët dyshohet se fokusonin kamerat dhe komentonin më pas në grup foto që shfaqnin këmbët, fytyrat, gjoksin apo kofshët e udhëtareve.

Ngjarja e rëndë doli në dritë falë vigjilencës së një pasagjereje në tramvajin e linjës numër 15. Ajo vuri re një shofer jashtë detyre, i cili mbante ende uniformën e kompanisë, teksa po shihte bisedat në grup në telefonin e tij.

Pasi dalloi se fotot e grave e kishin origjinën nga kamerat e sigurisë së tramvajit, të instaluara vetëm për qëllime sigurie, pasagjerja arriti të fotografonte ekranin e celularit të shoferit. Ajo ia përcolli provën një aktivisteje të njohur feministe, e cila më pas bëri denoncimin zyrtar pranë ATM-së.

Aktualisht mbetet e paqartë nëse imazhet e përdorura janë shkëputur nga sistemi CCTV i vetëm një tramvaji apo i disa prej tyre, si dhe nëse ato janë shpërndarë përtej këtij grupi specifik në WhatsApp.

Nga ana tjetër, udhëheqësit e sindikatave të ndryshme të transportit kanë dënuar ashpër sjelljen përmes një deklarate të përbashkët, duke theksuar se “respekti për dinjitetin njerëzor dhe barazinë gjinore janë vlera thelbësore” të cilat nuk mund të shkelen në asnjë rrethanë.

Top Channel