Luciana Kokaj që ka nisur aktivizmin në mbrojtje të pronës në Rrjoll dhe Edviol Kullurin për tokat në Dukat i ka bashkuar në Tiranë grupi nismëtar i protestës Flamingo.
“Unë jam 32 vjeçe, kam një djalë të vogël dhe punoj web developer freelancer, prej 4 muajsh kam stopuar çdo gjë. Në përballje me policinë dhe rojat private në Rrjoll, u ndjeva unë e tërhequr zvarrë nga video në Zvërnec. Nisi spontanisht me kërkesën për të dalë para drejtorisë së policisë dhe çdo gjë është e qytetarëve“, tha Luçiana Kokaj-aktiviste.
“Jemi diku 30-70 veta aktiv por edhe të tjerë më pak aktivë, por ky është shpërthim i popullit me kauza të ndryshme nga krahina të ndryshme”, tha Edviol Kulluri-aktivist.
Në javën e dytë të reagimit qytetar, Edvjoli në emër të grupit koordinues propozoi formimin e një Kuvendi Kombëtar të papolitizuar që të zhvillohet në të njëjtën kohë me protestën, për të mundësuar përbërjen e një qeverie teknike.
“Mendoj të jetë një tryezë popullore me 100 përfaqësues, 200 apo më shumë, ku secili të ndihet i përfaqësuar”, tha ai.
Koordinuesit shqetësohen për ndërhyrjen e përfaqësuesve politikë, teksa thonë se nuk mund të përjashtojnë dot askënd nga protesta, kërkojnë prej tyre distancimin nga partitë.
“Sheshi është i të gjithëve. Por nuk duam të uzurpohet ajo që po vjen prej klasës së vjetër”, u shpreh ai.
Top Channel
