Izraeli dhe Libani bien dakord për zbatimin e armëpushimit, SHBA ndërmjetëson marrëveshjen

Marrëveshja parashikon që armëpushimi të hyjë në fuqi vetëm nëse ndalet plotësisht zjarri nga Hezbollahu dhe të gjithë luftëtarët e grupit largohen nga Libani jugor.

Marrëveshja u arrit pas gati nëntë orësh negociata dhe vjen në një moment tensionesh të larta, pasi qeveria izraelite kishte paralajmëruar më herët përshkallëzim të operacioneve ushtarake në Liban. Armëpushimi ekzistues është shkelur vazhdimisht muajt e fundit, me sulme të ndërsjella mes Izraelit dhe Hezbollahut.

Në deklaratën e përbashkët, palët ranë dakord të rifillojnë bisedimet politike dhe të sigurisë gjatë javës së 22 qershorit, me synimin për të arritur një marrëveshje gjithëpërfshirëse. SHBA-ja do të vazhdojë të luajë rolin e ndërmjetësuesit dhe të lehtësojë komunikimin mes dy vendeve.

Një pjesë e rëndësishme e marrëveshjes është krijimi i zonave pilot në Libanin jugor, ku kontrolli i territorit do t’i kalojë ekskluzivisht Forcave të Armatosura Libaneze, duke përjashtuar çdo grup të armatosur jashtë strukturave shtetërore. Megjithatë, ende nuk është përcaktuar një afat për zbatimin e këtij plani.

Izraeli ritheksoi se siguria e tij mund të garantohet vetëm përmes çarmatimit të Hezbollahut dhe shkatërrimit të infrastrukturës së tij ushtarake në të gjithë Libanin. Nga ana tjetër, Libani kërkoi respektimin e kufijve ndërkombëtarë, zbatimin e plotë të armëpushimit dhe forcimin e sovranitetit shtetëror në të gjithë territorin e vendit.

Shtetet e Bashkuara u zotuan të mbështesin Forcat e Armatosura Libaneze për të rritur kapacitetet e tyre dhe për t’i mundësuar ushtrimin e kontrollit efektiv në të gjithë vendin.

Në fund të deklaratës, palët dënuan sulmet e Iranit në rajon dhe aktivitetet që, sipas tyre, cenojnë stabilitetin në Lindjen e Mesme përmes mbështetjes së grupeve të armatosura dhe veprimeve të tjera agresive.

Top Channel