Sulm me dron ukrainas ndaj një autobusi të linjës Moskë-Simferopol, shtatë të vdekur dhe 11 të plagosur

Lajmi u bë i ditur nga Denis Pushilin, kreu i administratës lokale të emëruar nga Rusia në rajon. Në një postim në Telegram, ai tha se droni goditi autobusin në qytetin Jenakiyevo.

“Në Jenakiyevo, një dron goditi një autobus, sipas informacioneve paraprake, shtatë civilë u vranë. Njëmbëdhjetë persona të tjerë u plagosën dhe të gjithë po marrin kujdesin e nevojshëm”, shkroi Pushilin.

Pas incidentit, Komiteti Shtetëror Hetues i Rusisë njoftoi hapjen e një hetimi penal për atë që e cilësoi si një “sulm terrorist”. Agjencia shtetërore e lajmeve TASS raportoi se hetimi është konfirmuar nga zëdhënësja e komitetit, Svetlana Petrenko.

Sulmi ndaj autobusit vjen në një kohë kur Rusia pretendon se është përballur me një valë të gjerë sulmesh me dronë gjatë natës. Ministria e Mbrojtjes e Rusisë deklaroi se sistemet e saj të mbrojtjes ajrore kanë rrëzuar gjithsej 354 dronë ukrainas në rajone të ndryshme të vendit.

Ndërkohë, guvernatori i rajonit të Leningradit, Alexander Drozdenko, tha se vetëm në rajonin që ai drejton janë rrëzuar 50 dronë gjatë natës, duke e cilësuar situatën si një nga sulmet më intensive të muajve të fundit.

Përshkallëzimi i sulmeve nuk është kufizuar vetëm në territorin rus. Në Ukrainë, autoritetet raportuan një tjetër viktimë civile si pasojë e një sulmi rus me dron.

Sipas Yaroslav Sanko, kreu i komandës ushtarake rajonale në Kherson, një grua 86-vjeçare humbi jetën pas një sulmi me dron rus në qytetin jugor ukrainas.

Lufta mes Rusisë dhe Ukrainës vijon të shoqërohet me sulme të ndërsjella me dronë dhe raketa, ndërsa të dyja palët raportojnë viktima civile dhe dëme në infrastrukturë. Sulmet e fundit tregojnë se përdorimi i dronëve mbetet një nga elementët kryesorë të konfliktit, me operacione që shtrihen larg vijave të frontit dhe prekin zona të banuara në të dyja vendet.

Top Channel