Një ngjarje e rëndë ka ndodhur në Vlorë, ku një 20-vjeçar u mor me forcë në automjet dhe më pas u dhunua me qëllim përfitimin e një shume monetare.
Strukturat hetimore dhe operacionale të DVP Vlorë, menjëherë pas marrjes së informacionit, organizuan punën për identifikimin, lokalizimin dhe kapjen e autorëve të dyshuar.
Si rezultat i operacionit policor të koduar “STRIKE 2”, specialistët e Seksionit për Hetimin e Krimeve ndaj Personit arrestuan në flagrancë shtetasin B. H., 24 vjeç, banues në fshatin Risili, Vlorë, dhe shpallën në kërkim policor shtetasit R. L., 30 vjeç dhe L. K., 34 vjeç (vëllezër), të dy banues po ashtu në fshatin Risili.
Nga hetimet paraprake dyshohet se këta shtetas, në bashkëpunim me njëri-tjetrin, kanë marrë me forcë të riun dhe e kanë çuar në një ambient të veçuar, ku e kanë dhunuar me qëllim përfitimin e shumës prej 6,000 euro.
Policia dhe Prokuroria po vijojnë punën për dokumentimin e plotë ligjor të ngjarjes dhe kapjen e shtetasve të shpallur në kërkim. Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprat penale “Rrëmbimi ose mbajtja peng e personit” dhe “Shtrëngimi me anë të kanosjes ose dhunës për dhënien e pasurisë”, të kryera në bashkëpunim.
Top Channel
