SHBA në bisedime me Iranin, Witkoff: Po diskutojmë për t’i dhënë fund luftës 03/05 22:29
Donald Trump ka refuzuar propozimin e fundit të Iranit, duke e cilësuar atë si të papranueshëm.
Në një intervistë të dielën për Kanalin 12 të Izraelit, Trump theksoi se kundërpropozimi i Teheranit, i lidhur me Ngushticën e Hormuzit dhe programin bërthamor, nuk ishte një mundësi për SHBA-në.
“Propozimi i ri iranian nuk është i pranueshëm për mua. E studiova atë, studiova gjithçka, nuk është i pranueshëm”, tha Trump. Ai gjithashtu shpjegoi se nuk do të pranonte lehtë propozimet nga Teherani.
“Iranianët duan të bëjnë një marrëveshje, por unë nuk jam i kënaqur me atë që ofruan”, shtoi Presidenti.
Propozimi iranian u bë publik pasi Teherani njoftoi se SHBA-të i ishin përgjigjur me një plan 14 pikash, të paraqitur përmes ndërmjetësit të Pakistanit, dhe se pala iraniane po shqyrtonte përgjigjen e Uashingtonit. Megjithatë, një zëdhënës i Ministrisë së Jashtme iraniane theksoi se “në këtë fazë, ne nuk po zhvillojmë negociata për programin bërthamor.”
Propozimi iranian, që i përgjigjet një plani me nëntë pika të paraqitur nga Uashingtoni, kërkonte një ndërprerje të plotë të armiqësive, duke hedhur poshtë propozimin amerikan për një armëpushim dy-mujor dhe duke kërkuar që çështjet kryesore të zgjidhen brenda 30 ditëve. Teherani theksoi se përparësia duhet të jetë përfundimi i luftës dhe jo një armëpushim i përkohshëm.
Në të njëjtën intervistë, Trump trajtoi sërish çështjen e faljes për kryeministrin izraelit Benjamin Netanyahu. “Ai është një kryeministër në kohë lufte. Izraeli nuk do të ekzistonte nëse nuk do të ishim unë dhe Bibi, me këtë rend”, tha Trump, duke shtuar se Izraeli ka nevojë për një kryeministër që mund të përqendrohet te lufta dhe jo te “budallallëqet.”
Top Channel
