Rezoluta për Kosovën, ekspertja: Sinjal i fuqishëm politik edhe për të gjithë Ballkanin 02/05 17:55
Trupat ruse po i afrohen qytetit strategjik të Kostiantynivkës në rajonin e Donetskut, duke u përpjekur të krijojnë një pikëmbështetje në periferi të një prej zonave më të fortifikuara të Ukrainës.
Sipas shefit të ushtrisë ukrainase, Oleksandr Syrskyi, forcat ruse kanë intensifikuar ndjeshëm përpjekjet ofensive gjatë muajit prill, duke përdorur taktika infiltrimi me grupe të vogla këmbësorie.
Ai tha se ushtria ukrainase po zhvillon operacione kundër-sabotimi për të zmbrapsur përparimin në periferi të qytetit.
Të dhënat nga projekti ukrainas i monitorimit të fushëbetejës DeepState tregojnë se forcat ruse ndodhen rreth një kilometër larg kufirit jugor të qytetit, ndërsa disa zona në juglindje konsiderohen “zona gri”, pa kontroll të plotë nga asnjëra palë.
Ministria ruse e Mbrojtjes pretendoi se ka marrë kontrollin e fshatit Novodmytrivka, në veri të Kostiantynivkës, ndërsa shefi i shtabit rus, Valery Gerasimov, deklaroi më herët se trupat po avancojnë si në veri, ashtu edhe në jug të qytetit.
Kostiantynivka është pjesë e një rrjeti qytetesh të njohura si “brezi i fortesave” në lindje të Ukrainës, i ndërtuar për të frenuar përparimin rus. Ky rajon mbetet një nga pikat më të nxehta të konfliktit.
Top Channel
