Pak minuta pasi urdhëroi të qëllohet mbi anijeve iraniane në Hormuz, Trump sulmon sërish Iranin: Nuk dinë as kë kanë udhëheqës 23/04 16:46
Presidenti i Shteteve të Bashkuara, Donald Trump, ka urdhëruar Marinën amerikane të godasë çdo anije iraniane që dyshohet se vendos mina në Ngushtica e Hormuzit, një nga korridoret më të rëndësishme detare në botë.
Sipas deklaratës së tij në rrjetet sociale, Trump theksoi se nuk duhet të ketë asnjë hezitim në veprimet e Marinës amerikane. “Kam urdhëruar Marinën e Shteteve të Bashkuara të qëllojë çdo anije që po vendos mina në ujërat e Ngushticës së Hormuzit. Nuk duhet të ketë hezitim”, shkruan Trump. Sakaq shton se operacionet për pastrimin e minave janë në vijim dhe do të intensifikohen.
Presidenti amerikan bëri të ditur se mjetet speciale për pastrimin e minave janë aktualisht në veprim në zonë, ndërsa ka urdhëruar rritjen e kapaciteteve në terren.
Ky zhvillim vjen në një moment kur SHBA po përpiqet të garantojë sigurinë e trafikut detar në këtë ngushticë strategjike, përmes së cilës kalon një pjesë e madhe e furnizimit global me naftë.
Si Trump, ashtu edhe Sekretari i Mbrojtjes, Pete Hegseth, kanë deklaruar më herët se forcat detare iraniane janë dëmtuar rëndë. Megjithatë, sipas raportimeve, Garda Revolucionare Islamike (IRGC) vijon të zotërojë mjete të vogla detare që mund të përdoren në operacione të tilla.
Situata në Ngushticën e Hormuzit mbetet kritike, ndërsa tensionet mes SHBA dhe Iranit rrisin rrezikun për përplasje të drejtpërdrejtë dhe ndikim në tregjet ndërkombëtare të energjisë.
Autoritetet amerikane pritet të vijojnë operacionet në zonë, ndërsa komuniteti ndërkombëtar ndjek me shqetësim zhvillimet.
Top Channel
