Përpjekjet për zgjidhjen dhe dhënien fund të fenomenit të lypjes jo vetëm që nuk kanë marrë zgjidhje, por edhe adresimi ka qenë i vakët. Shfrytëzimi i fëmijëve për lëmoshë, sot përbën një fenomen të jashtëligjshëm për të cilin mbyllen sytë.
Ironikisht, vëmendje marrin vetëm rastet e fataliteteve që bëjnë zhurmë dhe i përplasen si shuplakë shoqërisë në indiferentizmin e tyre të përgjithshëm.
Ky është rasti fatal i humbjes së jetës së një fëmije 7-vjeçar që po kërkonte lëmoshë në rrugë. Në kronologjinë e ngjarjes, shoferi i jep fillimisht fëmijës disa qindarka për ta ndihmuar.
Të miturit i bien paratë përpara makinës dhe shoferi nuk e shikon lëvizjen e tij. Në momentin që hapet semafori, fatkeqësisht nis lëvizjen dhe e përplas. E pas tij, një tjetër automjet hipën mbi trupin e të miturit duke bërë që plagët të jenë fatale.
Makina e parë ndalet dhe e dërgon në spital për t’i dhënë ndihmën e parë, por përpjekjet nuk janë të mjaftueshme. I mituri humb jetën në spital.
Ky është vetëm një nga shumë rastet që ndodhin me vogëlushët që janë në kushte rruge, por është më i zëshëm edhe për shkak të vëmendjes mediatike të madhe që pati.
“Ai fëmija, duhet të ishte në shkollë, duhet të ishte në kopsht, sepse ishte 7 vjeç. Nuk ishte aty. Fatkeqësi dypalëshe, asnjë prind nuk ka dëshirë që ta nxjerrë fëmijën në rrugë, asnjë shofer nuk do të shtypë asnjë fëmijë”, u shpreh Franko Velia, Sekretar i Përgjithshëm te Roma Versitas Albania
“Kur flasim për aksidente, nuk flasim vetëm për aksidente siç ishte rasti i fundit që janë raste të rralla, por flasim për shkatërrimin e mirëfilltë të fëmijërisë së këtyre fëmijëve”, u shpreh Altin Hazizaj, Drejtor i Qendrës për Mbrojtjen e të Drejtave të Fëmijëve
“Fakti që ndodhen në rrugët e kryqëzimet e qytetit rrezikojnë drejtpërdrejt jetën e tyre duke pasur parasysh se si funksionon edhe trafiku”, u shpreh ish-prokurori, Eugen Beci
Rreziqet ndaj fëmijëve në kushte rruge janë nga më të ndryshmet. Madje, vetë prokurorja e Tiranës, Alma Bramo, që ka në hetim rastin e dhimbshëm të 7-vjeçarit që humbi jetën, e pohon diçka të tillë në një intervistë për Inside Story.
“Është e rrezikshme, shumë e rrezikshme, pasi një fëmijë që lyp është i ekspozuar ndaj shumë rreziqeve. Mund të bëhet objekt dhune, mund të bëhet objekt shfrytëzimi. Ai mund të bëhet objekt i gjithë fatkeqësive dhe ekspozimeve që sjell rruga. Ju e thatë se ka pasur edhe fatalitete”, u shpreh Alma Bramo, prokurore
Nëse prokurorja ngre alarmin nisur nga rastet që ka ndjekur në detyrën e saj, specialistët vendosin direkt gishtin në plagë, teksa analizojnë motivet që kanë ndikuar në rritjen e numrit të fëmijëve që shfrytëzohen.
“Numrat e fëmijëve dhe ajo që është pjesa më zhgënjyese, numrat e fëmijëve në vend që të reduktohen, apo të eliminohen, në fakt numrat sidomos gjatë dy viteve të fundit tregojnë për një rritje të fenomenit”, u shpreh Altin Hazizaj, Drejtor i Qendrës për Mbrojtjen e të Drejtave të Fëmijëve.
“Situata e fenomenit të lypjes ka zgjatur prej vitesh dhe me kalimin e kohës ka ardhur më në rritje, më në dukje dhe si pasojë e disa faktorëve dhe problemesh me të cilat minoriteti rom përballet”, u shpreh Franko Velia, Sekretar i Përgjithshëm te Roma Versitas Albania.
Top Channel
