Pak orë pas deklaratës së Netanyahut për paqe, IDF nis një valë të re sulmesh në Liban, në shënjestrat Hezbollahu 09/04 22:20
Benjamin Netanyahu njoftoi se negociatat me Libanin do të fillonin menjëherë, pas bisedimeve me Donald Trump dhe të dërguarin special të Shtëpisë së Bardhë, Steve Witkoff, mes mosmarrëveshjeve të ashpra mbi fushëveprimin e një armëpushimi në Lindjen e Mesme.
Sipas zyrtarëve të lartë amerikanë, i dërguari i Shtëpisë së Bardhë i bëri thirrje kryeministrit izraelit të zvogëlojë intensitetin e sulmeve ndaj Libanit dhe të ecë përpara me negociatat.
Teherani pohon se Libani është i përfshirë në marrëveshjen e armëpushimit dhe akuzon Shtetet e Bashkuara dhe Izraelin për shkeljen e saj, duke lënë të hapur mundësinë e tërheqjes nga bisedimet e paqes ose mbajtjes së mbyllur të Ngushticës së Hormuzit. Nga ana e tyre, SHBA-të dhe Izraeli mohojnë se marrëveshja përfshin operacione izraelite kundër Hezbollahut në Liban.
Izraeli ka rritur ndjeshëm operacionet ushtarake në 24 orët pas marrëveshjes, me bastisje që, sipas Mbrojtjes Civile të Libanit, vranë të paktën 254 persona të mërkurën.
Në një deklaratë, Netanyahu tha se kishte urdhëruar fillimin e menjëhershëm të negociatave të drejtpërdrejta me Libanin, duke vënë në dukje se qëllimi i bisedimeve është çarmatimi i Hezbollahut dhe krijimi i kushteve për marrëdhënie paqësore midis dy vendeve. Në të njëjtën kohë, ai shprehu kënaqësi për deklaratën e kryeministrit libanez mbi nevojën për të demilitarizuar Bejrutin.
Sipas një zyrtari të lartë izraelit të cituar nga mediat amerikane, negociatat e drejtpërdrejta midis Izraelit dhe Libanit pritet të fillojnë javën e ardhshme, me takimin e parë që do të mbahet në Departamentin e Shtetit në Uashington.
Pala amerikane do të përfaqësohet nga ambasadori i SHBA-së në Liban, Michel Issa, ndërsa Izraeli do të përfaqësohet nga ambasadori i tij në Uashington, Yechiel Leiter. Libani do të përfaqësohet nga ambasadori i tij në Shtetet e Bashkuara, Nada Hamadeh-Moawad.
Top Channel
