Misioni Artemis II hyn në fazë kyçe, anija kozmike Orion i afrohet gjithnjë e më shumë anës së largët të Hënës 03/04 09:11
Misioni historik Artemis 2, që rikthen njerëzimin drejt Hënës pas më shumë se 50 vitesh, po vijon me sukses të plotë.
Sipas NASA-s, ekuipazhi ka përfunduar me sukses ndezjen e motorëve për të dalë nga orbita e Tokës dhe për të nisur udhëtimin drejt satelitit natyror.
Entuziazmi në bord është aq i madh, sa astronautët janë “ngjitur pas dritareve” për të shijuar pamjen spektakolare të hapësirës, madje duke i ndotur ato nga afërsia dhe kurioziteti për të fotografuar.
Gjatë transmetimit të drejtpërdrejtë, astronauti kanadez Jeremy Hansen deklaroi se ekuipazhi ndihet shumë mirë gjatë udhëtimit: “Ekuipazhi ndihet mjaft mirë këtu lart, në rrugën për në Hënë”. Ai shtoi se e ndjeu qartë forcën dhe përkushtimin e nevojshëm për një mision të tillë historik.
Hansen, i cili pritet të bëhet jo-amerikani i parë që udhëton drejt Hënës në një mision të tillë, theksoi gjithashtu rëndësinë e arritjes: “Njerëzimi ka demonstruar edhe një herë se çfarë është i aftë të bëjë”.
Misioni Artemis 2 konsiderohet një hap vendimtar drejt rikthimit të qëndrueshëm të njerëzve në Hënë dhe përgatitjes për eksplorime të ardhshme edhe më të thella në hapësirë.
Top Channel
