Kërcënimet e mundshme nga sulmet iraniane, sekretari britanik i Mbrojtjes: Do të dërgojmë trupa shtesë në Lindjen e Mesme

Gjatë një vizite në vendet e Gjirit, Healey deklaroi se ekipe dhe sisteme shtesë do të vendosen në Arabinë Saudite, Bahrein dhe Kuvajt, ndërsa dislokimi i avionëve luftarakë Typhoon në Katar do të zgjatet. Aktualisht, rreth 1,000 personel ushtarak britanik janë të angazhuar në mbrojtjen e Gjirit dhe Qipros.

“Mesazhi im për partnerët e Gjirit është: më të mirët e Britanisë do t’ju ndihmojnë të mbroni qiellin tuaj”, u shpreh ai.

Qeveria britanike thekson se roli i saj në rajon është i kufizuar në “veprime mbrojtëse”. Kryeministri, Keir Starmer, deklaroi se vendi “nuk do të përfshihet në këtë luftë”, por do të vazhdojë të mbrojë interesat dhe aleatët e tij.

Gjatë vizitës, Healey konfirmoi edhe vendosjen e sistemit të mbrojtjes ajrore Sky Sabre në Arabinë Saudite, si dhe dislokimin e sistemeve të tjera në Bahrein dhe Kuvajt. Këto përfshijnë sisteme të avancuara që mund të kapin raketa dhe avionë, duke u integruar në mbrojtjen ajrore të rajonit.

Ndërkohë, avionët Typhoon të Forcave Ajrore Mbretërore janë forcuar në Katar, në kuadër të bashkëpunimit me këtë vend.

Në të njëjtën kohë, Presidenti i SHBA-së, Donald Trump, ka kritikuar qëndrimin e Mbretërisë së Bashkuar dhe aleatëve të tjerë për mosangazhim të drejtpërdrejtë në konflikt. Në një postim në platformën Truth Social, ai u bëri thirrje vendeve që nuk morën pjesë në sulmet ndaj Iranit që të “sigurojnë vetë naftën e tyre” nga Ngushtica e Hormuzit.

Trump shtoi se këto vende duhet të “mësojnë të luftojnë për veten”, duke nënvizuar një qëndrim më të ashpër ndaj aleatëve.

Nga ana e tij, Healey paralajmëroi se “sulmet agresive të Iranit vazhdojnë të kërcënojnë aleatët dhe interesat” në rajon, duke theksuar se Mbretëria e Bashkuar do të vazhdojë të mbështesë partnerët dhe të kërkojë një zgjidhje të shpejtë të konfliktit.

Top Channel