Izraeli miratoi ligjin për dënimin me vdekje për vrasësit palestinezë, reagon Hamasi: Po ilustroni politikën tuaj të përgjakshme 30/03 22:51
Gjykata Supreme e Spanjës ka marrë një vendim të rëndësishëm që forcon më tej kuadrin ligjor kundër dhunës me bazë gjinore, duke përcaktuar se çdo kontakt fizik me natyrë seksuale pa pëlqim përbën sulm seksual dhe jo thjesht ngacmim.
Vendimi i gjykatës më të lartë erdhi pas shqyrtimit të një rasti ku një burrë u shpall fajtor për sjellje të papërshtatshme ndaj një gruaje në një stacion autobusi. Ai kishte kapur dorën e saj, e kishte puthur dhe kishte bërë oferta me përmbajtje seksuale, duke i propozuar që ta shoqëronte në këmbim të parave.
Mbrojtja kërkoi rikualifikimin e veprës penale në “ngacmim në rrugë”, por gjykata e hodhi poshtë këtë argument. Sipas trupës gjykuese, veprime të tilla përbëjnë një shkelje të drejtpërdrejtë të integritetit dhe lirisë seksuale të viktimës, duke kaluar përtej një gjesti të thjeshtë apo të padëmshëm.
Në arsyetimin e saj, gjykata theksoi se kontakti fizik i padëshiruar, i shoqëruar me qëllim seksual, përfaqëson një imponim të vullnetit të autorit mbi viktimën. Sipas vendimit, akti nuk ishte një veprim i rastësishëm, por një sjellje me përmbajtje të qartë seksuale që e redukton viktimën në objekt.
Si rezultat, u la në fuqi dënimi ndaj të pandehurit, i cili duhet të paguajë një gjobë prej 1,620 eurosh, ashtu siç ishte vendosur në shkallën e parë.
Ky vendim konsiderohet një hap i rëndësishëm në interpretimin më të rreptë të ligjit mbi pëlqimin dhe kufijtë personalë, në një vend që prej vitesh është në pararojë të politikave kundër dhunës ndaj grave. Që prej vitit 2004, Spanja ka miratuar një nga ligjet më të avancuara në Evropë për mbrojtjen nga dhuna me bazë gjinore, duke e forcuar vazhdimisht kuadrin ligjor në këtë drejtim.
Top Channel
