Sulmi në një sinagogë në Michigan, ushtria izraelite: Vëllai i autorit ishte komandant i Hezbollahut, u vra në shpërthim

Në një deklaratë të dielën, Forcat Mbrojtëse të Izraelit (IDF) thanë se Ibrahim Muhammad Ghazali, vëllai i sulmuesit, ishte përgjegjës për menaxhimin e operacioneve të armëve në njësinë Badr të grupit militant të mbështetur nga Irani.

Sipas ushtrisë izraelite, ai u vra më 5 mars gjatë një sulmi ajror ndaj një ndërtese ushtarake të Hezbollahut që përdorej për ruajtjen e armëve.

Zëdhënësi i IDF-së për gjuhën arabe, Avichay Adraee, tha se ndërtesa ishte pjesë e infrastrukturës ushtarake të grupit në rajon.

Ndërkohë, autoritetet në Shtetet e Bashkuara raportuan se Ayman Ghazali, 41 vjeç, drejtoi një automjet të mbushur me eksploziv drejt sinagogës pranë Detroit. Ai më pas shkëmbeu zjarr me rojet e sigurisë dhe vdiq nga një plagë me armë zjarri të shkaktuar nga vetë ai.

Sipas autoriteteve, një roje sigurie mbeti i plagosur dhe dhjetëra persona të ekipeve të emergjencës u trajtuan për thithje tymi. Më shumë se 100 fëmijë që ndodheshin në ndërtesë në momentin e incidentit nuk pësuan lëndime.

FBI e cilësoi incidentin si një “akt të synuar dhune kundër komunitetit hebre”.

Zyrtarë të zbatimit të ligjit thanë më parë për CNN se Ayman Ghazali, një shtetas amerikan i natyralizuar me origjinë nga Libani, ishte përmendur më parë në bazat e të dhënave të qeverisë amerikane për lidhje me persona të dyshuar të lidhur me Hezbollahun, megjithëse nuk besohej se ai ishte vetë anëtar i grupit.

Kryetari i bashkisë së Mashghara, në Liban, deklaroi gjithashtu se disa nga vëllezërit e Ayman Ghazali-t, përfshirë Ibrahim-in, u vranë në një sulm ajror më 5 mars. Sipas tij, në të njëjtin sulm u vranë edhe fëmijët e Ibrahim Ghazali-t.

IDF nuk përmendi në deklaratë vëllain tjetër të Ayman Ghazali-t, Kassim Ghazali, i cili sipas zyrtarëve lokalë u vra gjithashtu në të njëjtin sulm ajror.

Top Channel