FIFA po përgatitet të zbatojë ndryshime të rëndësishme në rregullat e futbollit, të cilat pritet të përdoren në Botërorin 2026 në Shtetet e Bashkuara, Kanada dhe Meksikë.
Një nga zhvillimet më të rëndësishme përfshin masa të reja për portierët, si dhe rregulla që synojnë të parandalojnë vonesat gjatë zëvendësimeve dhe rifillimeve të lojës.
Sipas udhëzimeve të reja, lojtari që do të zëvendësohet duhet të largohet nga fusha brenda 10 sekondave nga momenti kur gjyqtari sinjalizon ndryshimin.
Nëse lojtari nuk largohet brenda këtij afati, zëvendësuesi nuk do të lejohet të hyjë menjëherë në lojë, por do të duhet të presë të paktën një minutë dhe deri në ndalimin e ardhshëm të lojës.
Gjatë kësaj kohe, ekipi do të vazhdojë të luajë me vetëm dhjetë lojtarë në fushë. Ky ndryshim synon të reduktojë vonesat gjatë zëvendësimeve dhe të përshpejtojë kalimin midis lojtarëve.
Rregullat e reja gjithashtu trajtojnë vonesat gjatë rifillimeve nga rivëniet anësore. Nëse një ekip e vonon qëllimisht lojën, gjyqtari mund t’i japë topin ekipit kundërshtar, duke inkurajuar ritëm më të shpejtë të lojës dhe duke shmangur ndërprerjet e panevojshme.
Portierët që mbajnë topin për një kohë të gjatë do të penalizohen me një goditje këndi direkt për ekipin kundërshtar. Ky rregull synon të parandalojë taktikat e vonesës dhe të ruajë ritmin e ndeshjeve.
Sistemi VAR do të ketë kompetenca më të gjera dhe do të mund të ndërhyjë për të korrigjuar gabime të qarta, si një goditje këndi e dhënë gabim ose masa disiplinore të marra në mënyrë të pasaktë.
Top Channel
