Mbrojtësi i djathtë Kyle Walker ka njoftuar zyrtarisht tërheqjen nga kombëtarja e Anglisë, vetëm pak muaj para Kupës së Botës, duke deklaruar se është koha “t’i hapë rrugë brezit të ri”.
35-vjeçari zhvilloi gjithsej 96 ndeshje me fanellën e “Tre Luanëve”, ndërsa debutimin e bëri në vitin 2011 kundër Spanjës, kur ishte vetëm 21 vjeç.
Walker mori pjesë në 24 ndeshje në pesë turne madhorë mes UEFA Euro 2016 dhe UEFA Euro 2024. Ai ishte pjesë e skuadrës që arriti dy finale radhazi të Kampionatit Europian, ku Anglia u mposht fillimisht nga Italia dhe më pas nga Spanja. Gjithashtu ishte titullar në mbrojtjen me tre lojtarë gjatë rrugëtimit të Anglisë deri në gjysmëfinalet e Botërorit 2018.
Goli i vetëm i Walker me kombëtaren erdhi në vitin 2023 kundër Ukrainës, ndërsa ndeshja e fundit me Anglinë ishte humbja surprizë 3-1 në një miqësore ndaj Senegalit në qershor të vitit të kaluar. Ai largohet si lojtari i 11-të me më shumë paraqitje në historinë e Anglisë, vetëm katër ndeshje larg klubit prestigjioz të 100 ndeshjeve.
Në deklaratën e tij, Walker u shpreh: “Luajtja për Anglinë ka qenë gjithmonë nderi më i madh i karrierës sime. Çdo herë që vesha këtë fanellë ka pasur një domethënie të madhe për mua dhe familjen time. Pas shumë mendimesh, mendoj se ky është momenti i duhur për t’u tërhequr dhe për t’i dhënë hapësirë brezit të ri.”
Trajneri aktual i Anglisë, Thomas Tuchel, e vlerësoi mbrojtësin si “një nga më të mëdhenjtë e Anglisë”, duke theksuar se karriera e tij ndërkombëtare prej 14 vitesh dhe pesë turne madhorë është dëshmi e përkushtimit të tij.
Top Channel
