Kuvendi i Kosovës nuk ka mundur t’a zhvillojë raundin e parë për zgjedhjen e Presidentit, për shkak te mungesës së kuorumit.
Kryetarja e Kuvendit, Albulena Haxhiu, kërkoi në mbrëmjen e të enjtes interpretim nga Gjykata Kushtetuese.
“Sapo i jemi drejtuar Gjykatës Kushtetuese lidhur me vlerësimin e kushtetutshmërisë së procedurës për zgjedhjen e Presidentit të Republikës së Kosovës. Po ashtu, përmes kësaj kërkese, kemi kërkuar që Gjykata Kushtetuese të vendosë masë të përkohshme për pezullimin e afatit kushtetues që lidhet me procedurën e zgjedhjes së Presidentit, deri në publikimin e aktgjykimit. Lidhur me këtë, e kam njoftuar edhe Presidenten, Vjosa Osmani-Sadriu”, njoftoi kryeparlamentarja.
Për zgjedhjen e presidentit duhet 2/3 e deputetëve të Kuvendit të Kosovës.
“Unë nuk kam marr asnjë njoftim se pse mungojnë deputetët. Kërkoj nga deputetet e kuvendit që nuk janë të pranishëm të vijnë në sallë”, u shpreh Haxhiu.
Vetëm 66 deputetë në sallë, vazhdon seanca për zgjedhjen e presidentit.
Glauk Konjufca formalisht propozohet si kandidat për president, ndërsa përballë tij është Fatmire Kollçaku Mulhaxha.
Siç raporton gazetarja e Top Channel Leonita Bajrami, PDK dhe LDK kanë dalë kundër propozimeve të Osmanit për ndryshimin e Kushtetutës për zgjedhjen e Presidentit nga populli.
Zbardhen deklaratat nga seanca e jashtëzakonshme:
Arbërie Nagavci – deputete, Vetëvendosje
“Një president i zgjedhur nga qytetarët, duhet të fitojë votën e shumicës së qytetarëve dhe grupeve të ndryshme të shoqërisë, e jo vetëm të deputetëve, e kjo mund të bëj që një figurë mund të jetë përbashkuese për qytetarët dhe për vendin”.
Bedri Hamza – deputet, Partia Demokratike e Kosovës
“Ne konsiderojmë që kjo do një diskutim më të gjerë, një konsensus më të gjerë edhe politik, mes subjekteve politike edhe të gjithë tjerëve, që në të ardhmen të startojë në mënyrë të rregullt diskutimi për amendamentimin e Kushtetutës së Republikës së Kosovës.
Në këtë mënyrë, nuk mund të flasim në mënyrë meritore sonte. Jo sonte, por shumë më herët kam pritë që Kosova ta ketë zgjedhur presidenten, apo presidentin dhe jo të vijmë në këtë situatë ku në orët e fundit të mandatit, deputetët e Kuvendit të Republikës së Kosovës të sfidohen me një seancë të jashtëzakonshme, pa material dhe të flasim për amendamentimin e Kushtetutës
Në parim jemi për, por kjo kërkon një trajtim në përputhje me ligjet, rregulloren e Kushtetutën e Republikës së Kosovës”.
Lumir Abdixhiku – deputet, Lidhja Demokratike e Kosovës
“Mungesa e vullnetit të dyfishtë, përveç që duhen dy të tretat e shqiptarëve, duhen dy të tretat edhe të jo shqiptarëve dhe çështja e dytë që duhet ta kuptoni, në ato amendamente thotë qartë se këto amendamente hyjnë në fuqi gjashtë muaj pasi të votohen në kuvendin e Kosovës e ne jemi dy tre orë larg afatit parlamentar.
Edhe po t’i kalojmë, e duket që nuk i kemi pakicat këtu sepse nuk i kemi pas për 14 vite, sepse mos harroni që kërkesat e tyre kanë qenë shumë më të thella, kanë qenë për zëvendëspresident serb, prandaj s’kemi arritur asnjëherë të bëjmë kompromis, por edhe sikur të kalonte një gjë e tillë, këto amendamente hyjnë në fuqi gjashtë muaj nga sot, e ne jemi dy tre orë larg para dekretit potencial për zgjedhje të reja.
Kishte qenë mirë që këtë kohë ta kishim shfrytëzuar më mençur, por këto janë manovra politike, të natës, nata nuk ka bereqt, prandaj LDK-ja i mbështetë dhe i voton.”
Top Channel
