Trump reagon pas dëshmisë së Bill Clinton për çështjen Epstein: Nuk më pëlqen ta shoh në atë pozicion, por… 27/02 20:31
Shtetet e BE-së do të hapin një fond social për të ndihmuar gratë të kenë akses në aborte të sigurta.
Njoftimi i së enjtes vjen nga një fushatë e gjatë nga Komisioni Evropian që synonte financimin e një mekanizmi që do t’u lejonte grave që e kanë pothuajse të ndaluar në shtetet e tyre abortin, të shkonin dhe të kryenin procedurën në një shtet tjetër.
Në zemër të fushatës “Zëri Im, Zgjedhja Ime” ishte pretendimi se gratë në të 27 shtetet anëtare duhet të kenë akses të barabartë në aborte të ligjshme dhe të sigurta.
Më shumë se 1.2 milion njerëz u regjistruan në iniciativë, duke e detyruar Komisionin Evropian të përgjigjej. Propozimi u mbështet nga shumica e eurodeputetëve në dhjetor. Komisioni tha se vendet do të jenë në gjendje të mbështeten nga fondet e alokuara tashmë për shërbimet sociale për të mbështetur udhëtimin dhe aksesin në kujdesin pas abortit.
“Kjo është revolucionare“, tha Hadja Lahbib, komisionerja e BE-së për barazi duke shtuar se “ky vendim do të ndryshojë jetë“.
Qëllimi ishte të zvogëlohej numri i 500 mijë aborteve të pasigurta që ndodhin në Evropë çdo vit, tha ajo. “Sigurisht, për fat të keq, jetojmë në një kohë kur trupat e grave janë bërë fushëbeteja politike, kur të drejtat po shkelen në të gjithë botën. Por Evropa po qëndron e vendosur”, shtoi Labbib.
BE-ja ka parë një rritje të mbështetjes për partitë e ekstremit të djathtë, shumë prej të cilave kundërshtojnë abortin. Por Nika Kovač, koordinatorja e fushatës “Zëri Im, Zgjedhja Ime”, tha: “Për herë të parë, komisioni konfirmon pa mëdyshje se fondet e BE-së mund të përdoren për të garantuar akses në kujdes të sigurt për abort, veçanërisht për gratë në situata të cenueshme, pavarësisht se nga cili shtet evropian vijnë .
“Sot është një fitore për gratë në Evropë. Kjo nuk është simbolike. Është një angazhim politik për të drejtat e grave“, shtoi ajo.
Ndërsa aktivistët ishin të zhgënjyer që komisioni nuk kishte ndarë burime të reja financiare, ata përqafuan atë që e shihnin si një rrugë të re drejt garantimit të të drejtave të grave.
“Shtetet anëtare tani duhet të përdorin rrugën që u krijua”, tha Kovač. Aktivistët thanë se puna e tyre ishte larg të qenit e përfunduar, duke vënë në dukje se do të vazhdonin të shtynin komisionin për të siguruar fonde shtesë dhe të dedikuara për abortet.
Ata gjithashtu i bënë thirrje komisionit të jetë i shpejtë në dhënien e udhëzimeve të qarta shteteve anëtare se si mund të aksesonin fondet dhe në krijimin e një mjeti që gratë të aksesonin skemën në të gjithë bllokun europian.
Top Channel
