Pozita e trajnerit të Kombëtares së Marokut, Walid Regragui, është në dyshim vetëm katër muaj para fillimit të Kupës së Botës 2026.
Federata e Futbollit të Marokut e mohoi të martën se Regragui ka lënë postin, por pranoi se ka pasur bisedime me kandidatë të mundshëm për ta zëvendësuar, përfshirë ish-mesfushorin e Barcelonës, Xavi Hernandez.
Një marrëveshje me Xavin nuk është arritur ende, por një burim i njohur me situatën e trajnerit spanjoll ka treguar se 46-vjeçari do të preferonte të merrte postin pas Kupës së Botës këtë verë.
Regragui, 50 vjeç, e udhëhoqi Marokun në gjysmëfinalen e Kupës së Botës 2022 në Katar, duke e çuar Kombëtaren e Marokut në më të lartën që ka arritur një komb afrikan në këtë turne. Megjithatë, ai nuk ka mundur të fitojë asnjë nga dy kompeticionet më të rëndësishme për kombet afrikanë, Kupën e Kombeve të Afrikës, duke dështuar të arrijë titullin në edicionet e vitit 2023 dhe 2025.
Në vitin 2023, Maroku u eliminua në raundin e 16-shes në Kupën e Kombeve të Afrikës në Bregun e Fildishtë, dhe më pas humbi mundësinë për të fituar për herë të parë këtë kompeticion që nga viti 1976, pasi u mund nga Senegali në një finale të kontestuar që u zhvillua në kohën shtesë muajin e kaluar.
Investimi i Marokut në futboll gjatë 15 viteve të fundit ka rritur pritshmëritë dhe mundësitë për Kombëtaren, dhe Regragui është ballafaquar me pyetje të shumta për të ardhmen e tij, duke përfshirë kritika për stilin pragmatik të lojës.
Xavi, i cili u pensionua si lojtar një dekadë më parë pas një karriere të suksesshme te Barcelona, ku fitoi katër Kupa të Kampionëve dhe tetë tituj La Liga, ka drejtuar klubin e tij të fëmijërisë nga viti 2021 deri në vitin 2024, pas një periudhe si trajner i Al-Saad në Katar. Ai gjithashtu fitoi Kupën e Botës si lojtar në vitin 2010.
Top Channel
