Vrasja e bosit të drogës, si e ndoqi Meksika ‘El Mencho’ me ndihmën e ‘njeriut të besuar’ të të dashurës së tij dhe inteligjencës amerikane 24/02 10:49
Meksika është përfshirë nga një valë e fortë dhune pasi gjatë një operacioni sigurie u vra Nemesio Oseguera Cervantes, i njohur si “El Mencho”, kreu i kartelit të fuqishëm Jalisco New Generation Cartel.
Menjëherë pas lajmit për vrasjen e tij, grupe të armatosura dogjën dhjetëra automjete dhe bllokuan rrugët në shtetin e Jalisco dhe zona të tjera, ndërsa pamje dramatike nga Puerto Vallarta tregojnë autobusë dhe makina në flakë, me re të dendura tymi që mbuluan qytetin turistik. Banorët dhe turistët flasin për skena paniku dhe frike.
“Nuk kam përjetuar kurrë diçka të tillë, pamë një autobus që digjej dhe brenda pak minutash tymi ishte kudo”, rrëfeu një banor amerikan që jeton prej vitesh në zonë.
Një tjetër dëshmitar e përshkroi situatën si “zonë lufte”, duke thënë se qindra makina po digjeshin njëkohësisht dhe rrugët u boshatisën brenda pak minutash, ndërsa njerëzit u strehuan në hotele dhe biznese.
Autoritetet u kërkuan qytetarëve të qëndrojnë brenda, shumë shkolla e biznese u mbyllën, ndërsa fluturime të shumta u anuluan duke lënë turistë të bllokuar. Kompania Air Canada njoftoi rifillimin gradual të operacioneve, ndërsa presidentja Claudia Sheinbaum deklaroi se situata pritet të stabilizohet.
Megjithatë, tensioni mbetet i lartë dhe frika për përshkallëzim të mëtejshëm të dhunës vijon të jetë prezente në një nga zonat më të frekuentuara turistike të vendit.
Top Channel
