Njëmbëdhjetë të vdekur në tre sulme të reja, forcat ushtarake amerikane godasin anijet e drogës në Paqësor dhe Karaibe 17/02 20:20
Dy persona humbën jetën dhe tre të tjerë mbetën të plagosur pas të shtënave me armë zjarri gjatë një ndeshjeje hokeji të një shkolle të mesme në Pawtucket në Rhode Island të SHBA.
Policia konfirmoi se i dyshuari, Robert Dorgan, i njohur edhe si Roberta Esposito, vdiq nga një plagë e vetëshkaktuar brenda arenës.
Shefja e Policisë së Pawtucket, Tina Goncalves, deklaroi se ngjarja dyshohet të ketë qenë e synuar dhe mund të lidhet me një mosmarrëveshje familjare.
Ajo nuk bëri publike identitetet e viktimave. Sipas saj, ndërhyrja e një kalimtari mund të ketë ndikuar në përfundimin e shpejtë të incidentit tragjik.
Të shtënat ndodhën të dielën, ndërsa lojtarët ndodheshin në akull, duke shkaktuar panik mes sportistëve dhe familjeve në tribunë. Video nga vendngjarja tregon momentin kur dëgjohen krismat dhe ekipet largohen me vrap nga arena.
Ngjarja ndodhi rreth pesë milje në veri të kryeqytetit të shtetit, Providence, dhe rreth 45 milje në jug të Bostonit.
Dëshmitarët përshkruan skena kaotike dhe momente frike. Melissa Dunn, nëna e njërit prej lojtarëve, tha se fillimisht mendoi se zhurmat vinin nga përplasjet e zakonshme në akull. Ajo më pas pa ekipet e emergjencës duke kryer reanimacion kardiopulmonar në tribunë. “Mendimi i parë është: ku është fëmija im?”, tha ajo.
Një tjetër lojtar, Olin Lawrence, tregoi se ai dhe shokët e tij u fshehën në dhomën e zhveshjes sapo dëgjuan të shtënat. “Ishte shumë e frikshme. Kishte shumë të shtëna”, tha ai.
Guvernatori i Rhode Island, Dan McKee, reagoi duke shprehur ngushëllime për viktimat dhe familjet e tyre. Ai theksoi se shteti është sërish në zi, duke iu referuar një incidenti të mëparshëm me armë zjarri në Universiteti Brown.
Top Channel
