Legjenda holandeze Ruud Gullit ka sugjeruar se ish-kapiteni i Arsenalit, Robin van Persie, mund të jetë një kandidat i ardhshëm për postin e trajnerit të Manchester United.
Pas tetë sezonesh me Arsenalin, Van Persie iu bashkua Manchester United në verën e vitit 2012, ku luajti një rol kyç në fitimin e titullit të Premier League. Sot, 42-vjeçari ndodhet në fillimet e karrierës së tij si trajner dhe aktualisht drejton klubin e fëmijërisë, Feyenoord.
Skuadra nga Roterdami renditet e dyta në Eredivisie, megjithëse ka fituar vetëm dy nga shtatë ndeshjet e fundit dhe ndodhet 16 pikë larg kryesuesve të PSV-së. Pavarësisht vështirësive, Gullit beson se Van Persie ka potencial të madh për të ardhmen.
Në një intervistë për Gambling Insider, Gullit u shpreh: “Do të ishte fantastike nëse Robin van Persie do të bëhej një ditë trajner i Manchester United. Shpresoj vërtet që kjo të ndodhë. Ai është një trajner shumë i mirë, por aktualisht po kalon një periudhë të vështirë te Feyenoord.”
Sipas Gullit, pritshmëritë ndaj Van Persie janë jashtëzakonisht të larta për shkak të karrierës së tij të shkëlqyer si lojtar, çka e vendos atë nën një presion më të madh se trajnerët e tjerë në Holandë.
“Ai është nën kritika për momentin, por shpresoj që t’i jepet koha e nevojshme për të treguar vlerat e tij. Mjafton të shikosh çfarë ndodhi me Sir Alex Ferguson te Manchester United – klubi i qëndroi pranë dhe rezultati ishte i jashtëzakonshëm,” shtoi Gullit.
Ndërkohë, Manchester United po kalon një moment pozitiv nën drejtimin e trajnerit të përkohshëm Michael Carrick, ish-shok skuadre i Van Persie. Që prej marrjes së drejtimit pas largimit të Ruben Amorim, “Djajtë e Kuq” kanë fituar katër ndeshje radhazi. Një fitore e pestë në Premier League ndaj West Ham do të shënonte herën e parë pas më shumë se tre vitesh që klubi arrin një seri të tillë.
Sa i përket së ardhmes së pankinës së United, ish-kapiteni Gary Neville ka konfirmuar se klubi ka nisur zyrtarisht procesin për gjetjen e një trajneri të ri, por Van Persie nuk konsiderohet ende një opsion konkret.
Megjithatë, siç sugjeron edhe Gullit, nëse një situatë e ngjashme paraqitet në vitet në vijim, emri i Robin van Persie mund të jetë një nga kandidatët për stolin e “Old Trafford”.
Top Channel
