Dy ditë para shqyrtimit të çështjes në Gjykatën Kushtetuese, qeveria shfuqizon vendimin për bllokimin e rrjetit social TikTok, duke rikthyer aksesin e plotë për të gjithë përdoruesit.
Në një vendim të Këshillit të Ministrave, të datës 3 shkurt 2026, që mban firmën e kryeministrit Edi Rama, qeveria rikthen aksesimin në aplikacion.
Në vendimin e qeverisë, sqarohet se Autoriteti Kombëtar për Sigurinë Kibernetike, në bashkëpunim me entet rregullatore të fushës, ndërmerr veprimet e nevojshme për realizimin e heqjes së masave për ndërprerjen e aksesit të kësaj platforme.
Të enjten e 5 shkurtit, Gjykata Kushtetuese do të shqyrtonte vendimin për mbylljen e platformës, seancë e kërkuar nga Asociacioni i Gazetarëve, me argumentin se mbyllja e TikTok kishte prodhuar pasoja për lirinë e shprehjes dhe informimit. Po më 3 shkurt, qeveria i është drejtuar Gjykatës Kushtetuese me kërkesën për pushimin e çështjes, me argumentin se vendimi i bllokimit është shfuqizuar.
Platforma sociale TikTok u mbyll në mars të vitit 2025, pas vrasjes me thikë të 14-vjeçarit Martin Cani nga një bashkëmoshatar i tij, pas një sherri të nisur në rrjetet sociale. Vendimi erdhi pas konsultimit të gjerë me prindër e mësues, ndërsa tashmë aplikacioni është rihapur për 1.5 milionë përdorues shqiptarë.
Top Channel
