38-vjeçarja ra në koma për dy vite pas lindjes, disa punonjës të spitalit nën hetim në Itali, dyshohet se… 23/01 18:10
Një gjykatë e Afrikës së Jugut ka hedhur poshtë një apel nga agjencia e trashëgimisë kulturore të vendit për të ndaluar shitjen dhe eksportin e sendeve që lidhen me heroin e luftës kundër aparteidit, Nelson Mandela.
70 sendet personale përfshijnë një çelës qelie nga Ishulli Robben, ku Mandela u burgos për 18 nga 27 vitet e tij, një palë syze dielli Aviator dhe një nga këmishat e tij karakteristike me lule. Sendet ishin planifikuar të eksportoheshin në Shtetet e Bashkuara për ankand.
BBC raporton se sendet i përkasin vajzës së tij të madhe, Makaziwe Mandela, dhe Christo Brand, rojtarit të Robben Island gjatë burgosjes së Mandelës.
Koleksioni përfshin gjithashtu një kopje të Kushtetutës së Afrikës së Jugut të vitit 1996 të nënshkruar nga Mandela, një nga vizatimet e tij me qymyr, një kartë identiteti, një raketë tenisi që ai përdori në Robben Island dhe dhurata nga udhëheqës botërorë, përfshirë një nga ish-Presidenti i SHBA-së Barack Obama dhe gruaja e tij Michelle.
Në përpjekjen e tyre për të ndaluar shitjen e tyre, autoritetet kanë thënë se sendet janë pjesë e trashëgimisë kulturore të vendit dhe për këtë arsye mbrohen me ligj dhe nuk mund të eksportohen.
Agjencia e Trashëgimisë së Afrikës së Jugut (SAHRA) mësoi për herë të parë për shitjen e mundshme nga një artikull gazete britanike në fund të vitit 2021, i cili raportoi se çelësi do të shitej për mbi 1 milion paund (1.15 milion euro) .
Agjencia më pas i shkroi shtëpisë amerikane të ankandeve Guernsey, e cila po planifikonte shitjen, duke i kërkuar asaj të pezullonte ankandin dhe të kthente sendet në Afrikën e Jugut. Vajza e Mandelës donte t’i përdorte të ardhurat nga shitja për një kopsht përkujtimor në varrin e Mandelës. Në vendimin e saj, Gjykata e Lartë e Apelit tha se interpretimi i Sahrës për sendet që bien nën Aktin Kombëtar të Pronës Kulturore ishte shumë i gjerë. Nuk është ende e qartë nëse autoritetet do të kërkojnë rrugë të tjera ligjore për të bllokuar shitjen.
Makaziwe Mandela, vajza e vetme e aktivistit të Afrikës së Jugut nga gruaja e tij e parë, e mirëpriti vendimin e Gjykatës së Lartë. Ajo shtoi se ende nuk ishte marrë një vendim se çfarë do të ndodhte me sendet që ishin vendosur të nxirreshin në ankand.
Top Channel
