Mark Nika, xhaxhai Aleks Nikës, një prej katër viktimave të 21 Janarit, nuk është ndalur së kërkuari drejtësi këto 15 vite.
Në një intervistë me gazetarin e Top Channel Muhamed Veliu, ai shprehet i shqetësuar për retorikën politike të këtyre 15 viteve nga politika për 21 Janarin. Ai e shikon bërjen drejtësi për këtë ngjarje vetëm nga SPAK.
Muhamed Veliu- Mark, gjatë këtyre 15 viteve, ku e keni gjetur forcën për mos u ndalur duke kërkuar drejtësi për 21 janarin.
Mark Nika- Forcën për të kërkuar drejtësi e kemi gjetur te gjaku i Aleksit. Sipas SPAK-ut janë kryer veprimet hetimore dhe jemi drejt përfundimit të hetimit të çështjes sonë.
Muhamed Veliu: Jeni të kënaqur nga hetimet e deritanishme të SPAK?
Mark Nika: Kemi vërejtje kuptohet, por dosja e 21 Janarit ishte e masakruar, prokurorët dhe hetuesit po bëjnë një punë të lavdërueshme për ta restaruar këtë dosje dhe çështja t’i jepet drejtësisë
Muhamed VelIu: Si kanë qenë këto 15 vite për prindërit e Aleksit?
Mark Nika: Presin vetëm drejtësi, te shteti dhe jo te Qeveria. Qeveria ka pasur një indiferencë, drejtësinë e kanë penguar ose zvarritur. Prokurorët të ndikuar politikisht dhe gjykatësit të lidhur me partitë politike.
Muhamed Veliu: Si i keni parë qëndrimet politike për 21 janarin gjatë këtyre 15 viteve?
Mark Nika: Është një luftë mes të majtës dhe të djathtës politike që nuk i ka shërbyer hetimit. Prokurorët një pjesë janë të lidhur me politikën, sot SPAK është zhveshur nga ndikimet politike sipas nesh dhe hetimin e çështjes po e bën të arsyetuar,
Muhamed Veliu: Si reagojnë vajzat e Aleksit, sa herë në familjen tuaj diskutohet për të?
Mark Nika: Janë shumë të mërzitura sepse drejtësia nuk funksionon, duan të dinë se kush e donte gjakun e Aleksit në Bulevard, pse ia vranë babanë. E dinë që nuk kthehet më, por zbardhja e çështjes do t’i lehtësojë shpirtin.
Top Channel
