Protestat kundër autoriteteve të anti-imigracionit në Minesota, Pentagoni vendos në gatishmëri 1500 ushtarë në rast përshkallëzimi 19/01 15:56
Zyrtarët më të lartë të sigurisë në Mbretërinë e Bashkuar kanë lëshuar një paralajmërim të ri për rrezikun e shtuar nga sulmet kibernetike të grupeve hakerësh pro-rusë.
Qendra Kombëtare e Sigurisë Kibernetike (NCSC), pjesë e shërbimit inteligjent GCHQ, njoftoi se të ashtuquajturat grupe “haktiviste” po synojnë të bllokojnë faqet e internetit dhe të ndërpresin aksesin në shërbime online jetike.
Sipas NCSC-së, këto grupe po përdorin kryesisht sulme të mohimit të shërbimit (DoS), të cilat mbingarkojnë sistemet dhe i bëjnë faqet e internetit të paarritshme për përdoruesit. Organizatat janë nxitur të rishikojnë menjëherë masat e tyre mbrojtëse dhe të forcojnë sigurinë digjitale.
Drejtori i NCSC-së për rezistencën kombëtare, Jonathan Ellison, tha se edhe pse sulmet DoS janë teknikisht të thjeshta, ndikimi i tyre mund të jetë serioz, pasi pengojnë qytetarët të kenë akses në shërbime thelbësore. Ai u bëri thirrje veçanërisht institucioneve të identifikuara në alarmin e sotëm të zbatojnë udhëzimet falas të NCSC-së për mbrojtje ndaj këtyre kërcënimeve.
Në paralajmërim përmendet konkretisht grupi NoName057(16), i cili dyshohet se ka kryer sulme të shpeshta DoS ndaj faqeve të qeverive lokale në Britani. Grupi është aktiv që nga marsi i vitit 2022 dhe ka shënjestruar gjithashtu institucione shtetërore dhe sektorin privat në vendet e NATO-s dhe shtete të tjera evropiane që konsiderohen armiqësore ndaj interesave ruse.
Sipas autoriteteve britanike, motivimi i këtyre grupeve është ideologjik dhe jo financiar, çka e bën kërcënimin të vazhdueshëm dhe të paparashikueshëm.
Top Channel
