Video/ Zelanda e Re mirëpret Vitin e Ri 2026, spektakël fishekzjarrësh në sheshet e vendit 31/12 12:42
Vajza e Jimmy Lai, 78-vjeçarit të burgosur në Hong Kong, ka shprehur shqetësime serioze për përkeqësimin e shëndetit të babait të saj. Ajo tha se thonjtë e tij po bien dhe dhëmbët po i kalben, ndërsa dyshojnë se ai po keqtrajtohet në burg.
Lai, 78 vjeç, është në paraburgim që nga dhjetori i vitit 2020 dhe përballet me burgim të përjetshëm. Më herët këtë muaj, ai u dënua për bashkëpunim me forcat e huaja sipas ligjit të diskutueshëm të sigurisë kombëtare (NSL) të qytetit. Autoritetet kineze kanë mohuar se ai është keqtrajtuar dhe thonë se Lai është në gjendje të mirë shëndetësore.
BBC ka lexuar një letër nga familja e Lai-t, e cila i kërkon kryeministrit britanik Keir Starmer të bëjë thirrje për lirimin e tij gjatë takimit me presidentin kinez Xi Jinping muajin e ardhshëm. Vajza e Lai-t, Claire, që ndodhet në mërgim në Londër, i tha BBC-së se ka frikë se mund ta shohë kurrë më të atin.
“Ai ka humbur një sasi të konsiderueshme peshe. Është diabetik, ka probleme me zemrën dhe dhimbje shpine. Disa ditë nuk mund të qëndrojë në këmbë ose të ngrihet nga shtrati,” tha Claire Lai. Ajo e përshkroi babanë si “të fuqishëm dhe të fortë” kur shkoi në burg, por gjendja e tij ka ndryshuar gjatë vitit të fundit.
Familja ka shprehur shqetësime të përsëritura për shëndetin e tij. Djali i tij, Sebastien, tha më parë se “trupi i babait po shkatërrohet”.
Një zëdhënës i Zyrës së Komisionerit të Ministrisë së Jashtme kineze në Hong Kong deklaroi se Lai është “në gjendje të mirë shëndetësore” dhe se i është siguruar një mjedis “i sigurt, human dhe i përshtatshëm”.
Lai është një nga personat më të njohur të akuzuar sipas Ligjit NSL, i cili u prezantua në 2020 për të frenuar protestat masive pro-demokraci. Ai u akuzua për lobim ndaj qeverive të huaja dhe për publikimin e materialeve nxitëse përmes gazetës së tij Apple Daily, e cila tashmë nuk ekziston më.
Pas dënimit të tij këtë muaj, Mbretëria e Bashkuar e konsideroi rastin si “persekutim të motivuar politikisht” dhe ka kërkuar vazhdimisht shfuqizimin e Ligjit të Sigurisë Kombëtare. Autoritetet kineze kanë kundërshtuar këto kritika, duke i quajtur përpjekjet perëndimore për të ndikuar në gjyq “shkelje të sundimit të ligjit”.
Takimi i Starmer me Xi Jinping në fund të janarit 2026 do të jetë vizita e parë e një kryeministri britanik në Kinë që nga viti 2018.
Top Channel
