“Ngushtica e Hormuzit do të hapet shumë shpejt”, Trump: Dua që ta kontrollojmë bashkë me Iranin, unë dhe Ajatollahu, apo kushdo që do të jetë në të ardhmen 23/03 15:49
Eurostar njoftoi se planifikon të operojë shërbim të plotë sot, por paralajmëroi për vonesa dhe anulime të mundshme në minutën e fundit, pas një problemi me furnizimin me energji elektrike që ndërpreu qarkullimin e trenave në Tunelin e Kanalit të La Manshit, duke lidhur Londrën me kontinentin europian.
Problemi detyroi operatorin të pezullojë të gjitha shërbimet mes Londrës, Parisit, Amsterdamit dhe Brukselit, pikërisht në pragun e Vitit të Ri, duke lënë mijëra pasagjerë të bllokuar dhe në kërkim të alternativave.
“Shërbimet kanë rifilluar sot pas një problemi me energjinë elektrike në Tunelin e Kanalit dje, si dhe disa çështjeve të tjera me infrastrukturën hekurudhore gjatë natës,” tha Eurostar në një deklaratë. Sipas kompanisë, problemi elektrik u shoqërua edhe me një defekt të një treni LeShuttle në tunelin 50 kilometra të gjatë që lidh Folkestone në Anglinë juglindore me Coquelles në Francën veriore.
Madje, u raportuan anulime edhe në linja brenda kontinentit që nuk përdorin tunelin, si Parisi–Brukseli. Në St Pancras International në Londër dhe në Gare du Nord në Paris, turma udhëtarësh me valixhe u mblodhën pasi planet e pushimeve të fundvitit u vunë në pikëpyetje. “Jemi të zhgënjyer, donim ta festonim Vitin e Ri në Paris,” tha një udhëtare 21-vjeçare për AFP, ndërsa të tjerë kërkonin fluturime, tragete apo rrugë alternative.
Eurostar, që transportoi një rekord prej 19.5 milionë pasagjerësh vitin e kaluar, ka monopol në shërbimet e pasagjerëve përmes tunelit që nga hapja e tij në vitin 1994. Megjithatë, kompania është kritikuar për çmimet e larta, sidomos në linjën Paris-Londër, dhe ka pasur disa ndërprerje edhe më herët këtë vit për shkak të defekteve teknike dhe vjedhjes së kabllove në Francën veriore.
Top Channel
