Napoli, Lukaku edhe 3 javë të tjera jashtë fushave të lojës, Drejtori Sportiv, Manna: Do të përforcohemi në sulm 31/12 14:02
Massimo Moratti ka lënë pas një nga periudhat më të vështira të jetës së tij. Presidenti legjendar i Interit mbajti të gjithë në ankth në fund të verës, kur u shtrua në spital për shkak të një pneumonie të rëndë që i shkaktoi edhe probleme serioze respiratore. Pas rreth një muaji në spital, ai u kthye në shtëpi dhe sot gëzon shëndet të përmirësuar, duke ndjekur nga afër një Inter që kryeson kampionatin në fundin e vitit 2025.
“Ndihem më mirë, pa dyshim më mirë”, ka deklaruar Moratti në një intervistë për Il Giorno. “Ka pasur ditë shumë të vështira, por në spital pothuajse nuk e kuptova çfarë po ndodhte. Vetëm pasi më ekstubuan fillova ta kuptoj situatën dhe më shpjeguan gjithçka. Jam një njeri me fat, sepse përfundova në duart e duhura”.
“Jam prekur nga gjithë kjo dashuri”
Moratti ka folur edhe për valën e madhe të mbështetjes që mori gjatë sëmundjes. “Ishte e mrekullueshme të ndieja gjithë këtë dashuri. Nuk është kurrë e mirëqenë. Falënderoj tifozët tanë, ish-futbollistët, miqtë dhe të gjithë ata që qenë pranë meje dhe familjes sime. Por falënderimi më i madh shkon për mjekët dhe stafin shëndetësor: kanë qenë të jashtëzakonshëm”.
Interi, skuadra më e plotë e kampionatit
Vëmendja e Morattit kalon natyrshëm te Interi aktual, për të cilin shprehet me optimizëm. “Jemi në mes të sezonit, por në kampionat mendoj se Interi është skuadra më e plotë. Luajnë mirë, kanë zemër dhe guxim, janë argëtues dhe shumë të bashkuar. Humbjet janë të pashmangshme, por kjo skuadër jep gjithmonë ndjesinë se mund të përmirësohet, në çdo garë”.
Një vlerësim i veçantë shkon për kapitenin: “Kemi një kapiten të shkëlqyer”.
Lautaro, trashëgimtari i Zanettit
Moratti e sheh gjithnjë e më shumë Lautaro Martinez si pasardhësin natyral të Javier Zanettit. “Është e drejtë që të jetë kështu. Lautaro po tregon se është një lider i vërtetë, jo vetëm një kampion. Ai mishëron shpirtin e Interit dhe është kapiteni ideal për këtë skuadër”.
Besimi te Chivu, brenda dhe jashtë fushës
Fjalë me peshë edhe për trajnerin Cristian Chivu. “Personalisht nuk kam pasur kurrë dyshime. Mund të ishte një zgjedhje e guximshme, por deri tani ka rezultuar e duhura. E njihja si futbollist: ishte i shkëlqyer në fushë dhe shumë i dobishëm për trajnerin”.
Moratti ndalet edhe te ana njerëzore e Chivut: “Ka cilësi të rralla. Më kujtohet që shkonte në kampet rome pranë Milanos për t’u mësuar italisht fëmijëve. Nuk është vetëm një trajner i mirë, por një njeri me kulturë, inteligjencë dhe ndjeshmëri të jashtëzakonshme. Dhe ndonjëherë pimë edhe nga një cigare bashkë – ndoshta edhe kjo ndihmon që të shkojmë kaq mirë”.
Një Moratti i qetë, mirënjohës dhe optimist, që sheh Interin nga maja dhe shijon një fundviti mes shëndetit të rikthyer dhe pasionit të përjetshëm për ngjyrat zikaltër.
Top Channel
