Itali/ Rekord reshjesh në Evropë, 3 metra dëborë në Prato Nevoso 27/12 14:00
Shtatë milionë euro nga qelizat italiane të Hamasit përmes tre shoqatave të bamirësisë për popullin palestinez, që në vend të kësaj dyshohet se janë destinuar për organizatën përgjegjëse për masakrën në Izrael më 7 tetor të dy viteve më parë.
Ky është përfundimi i hetuesve të Prokurorisë Kombëtare Antimafia dhe Antiterrorizëm, të cilët bashkë me DIGOS-in e Gjenovës arrestuan sot nëntë persona, mes tyre edhe disa që i përkasin seksionit të jashtëm të Hamasit. Hetimi është finalizuar në bashkëpunim me Gardën e Financës.
Bëhet fjalë për Shoqatën Bamirëse të Solidaritetit me Popullin Palestinez, themeluar në Gjenovë në vitin 1994, një organizatë analoge vullnetare e vitit 2003 dhe La Cupola d’Oro, e hapur në Milano po në të njëjtin vit, të administruara nga Mohammad Hannoun, i konsideruar pjesëtar i sektorit të jashtëm të Hamasit dhe në krye të qelizës italiane. Të nëntë janë të akuzuar për asociacion me qëllime terrorizmi, përfshirë edhe atë ndërkombëtar, ose për përmbysje të rendit demokratik. Operacioni, i koordinuar nga Prokuroria e Gjenovës, e cila kërkoi dhe mori nga gjykatësi masat e sigurimit, ka nisur edhe mbi bazën e bashkëpunimit ndërkombëtar, sidomos me autoritetet holandeze, për të përcaktuar kontaktet mes përfaqësuesve të shoqatave të bamirësisë dhe Lëvizjes së Rezistencës Islamike, që për BE-në është një organizatë terroriste.
«Në veçanti – shpjegojnë hetuesit – atyre u ngarkohen operacione financimi që dyshohet se kanë kontribuar ndjeshëm në aktivitetet kriminale të organizatës terroriste, për një shumë totale prej rreth 7 milionë eurosh, përmes triangulimeve me transfertë bankare ose mënyra të tjera nëpërmjet shoqatave me seli jashtë vendit, në favor të shoqatave me seli në Gaza, në Territoret Palestinezë ose në Izrael, të shpallura të paligjshme nga shteti i Izraelit, sepse u përkasin, kontrollohen ose janë të lidhura me Hamasin dhe drejtpërdrejt në favor të eksponentëve të saj, si Osama Alisawi, ish-ministër i qeverisë de facto në Gaza, i cili, në disa raste të veçanta, kërkonte këtë mbështetje financiare.»
Komenti i ministrit Piantedosi
«Është një operacion shumë i rëndësishëm dhe domethënës ai i përfunduar këtë mëngjes nga policia e Shtetit dhe ajo e Financës me arrestimin e nëntë personave, mes të cilëve më i njohuri Mohammad Hannoun. Edhe pse duhet të respektohet prezumimi i pafajësisë në këtë fazë, është çarë perdja mbi sjellje dhe aktivitete që, pas fasadës së nismave në favor të popullsive palestineze, fshihnin mbështetje dhe pjesëmarrje në organizata me qëllime të mirëfillta terroriste me natyrë islamiste. Është një rrezik ndaj të cilit qeveria jonë i kushton vëmendje maksimale – shpjegon ministri i Brendshëm Matteo Piantedosi. Falë profesionalizmit të policëve të Drejtorisë Qendrore të Policisë së Parandalimit dhe njësive specialiste të Gardës së Financës, është bërë e mundur rindërtimi i kontakteve dhe flukseve financiare në shkallë ndërkombëtare: një dëshmi tjetër e aftësive hetimore të forcave tona të policisë, që konfirmohen ndër më të mirat në botë…»
«Siç është e kuptueshme, hetimet dhe faktet e zbuluara nuk mund të zbehin aspak rëndësinë e krimeve të kryera kundër popullsisë palestineze pas 7 tetorit 2023 gjatë operacioneve ushtarake të ndërmarra nga qeveria izraelite, për të cilat pritet gjykimi nga Gjykata Penale Ndërkombëtare…» shpjegojnë Prokurori Kombëtar Antimafia dhe Antiterrorizëm Giovanni Melillo dhe Prokurori i Përgjithshëm i Gjenovës Nicola Piacente. «Në të njëjtën kohë, këto krime nuk mund të justifikojnë aktet terroriste (përfshirë ato të 7 tetorit 2023) të kryera nga Hamasi…»
Pagesat nga shoqatat
Në detaje, për hetuesit, Hannoun akuzohet se ka qenë «pjesëtar i nivelit drejtues të Hamasit dhe ka destinuar një pjesë të konsiderueshme (më shumë se 71%) të fondeve të mbledhura, të deklaruara si humanitare, për financimin direkt të Hamasit ose shoqatave të lidhura me të», duke kontribuar me gjithsej 7.288.248,15 euro nga 18 tetori 2001 deri sot, sidomos pas 7 tetorit 2023.
Ai, i konsideruar pjesëtar i «sektorit të jashtëm» dhe anëtar i bordit drejtues të European Palestinians Conference, dyshohet të ketë vepruar si përfaqësues ligjor e administrator de facto i disa shoqatave, madje duke krijuar të reja për të vazhduar financimet pavarësisht kufizimeve bankare.
Mes të ndaluarve janë edhe punonjës dhe referentë në Firence e Toskanë, si dhe vetë ministri i Transportit të qeverisë së Gazës, Alisawi, bashkëthemelues në vitin 1994 i A.B.S.P.P., të cilët akuzohen se kanë bashkëndarë vendimet me Hannoun-in. Hetuesit kanë rindërtuar lëvizje fondesh nga Italia dhe vende të tjera, si Turqia, drejtpërdrejt në Gaza, duke kontribuar me vetëdije në financimin e organizatës terroriste. Sipas tyre, krijimi i një qelize të jashtme të Hamasit në Itali ka qenë pjesë e një projekti strategjik të vetë organizatës.
Bashkëpunimi me Izraelin
I rëndësishëm ka qenë kontributi i dokumenteve të dërguara zyrtarisht nga shteti i Izraelit në kuadër të bashkëpunimit gjyqësor, nga të cilat ka rezultuar se A.B.S.P.P. mund të konsiderohet një degë e Hamasit që vepron në Itali dhe pjesë e një rrjeti evropian.
Dhjetëra shoqata në Gaza dhe jashtë saj, të kontrolluara nga Hamasi, kanë përfituar donacionet. «Nuk ka qenë thjesht bamirësi humanitare – shpjegojnë hetuesit – por të pandehurit janë bërë me vetëdije përgjegjës për devijimin e fondeve nga qëllimet asistenciale drejt financimit të drejtpërdrejtë të organizatës terroriste dhe aktiviteteve të saj kriminale.»
Top Channel
