Dyshohet se u përfshi në një skandal me falsifikimin e diplomave, Polonia pezullon ambasadorin e saj në Francë

Ministria e Jashtme bëri të ditur vendimin të mërkurën, pas raportimeve se agjencia polake kundër korrupsionit CBA kishte ndaluar diplomatin i identifikuar si Jan R. sipas ligjeve polake për privatësinë për dyshimet e përfshirjes së tij me institucionin më parë të njohur si Collegium Humanum.

Sipas mediave të huaja, universiteti ka qenë në qendër të një hetimi për ofrimin e programeve të shpejta MBA, të cilat sipas raportimeve mundësuan që të diplomuarit të siguronte poste të larta në kompani shtetërore pa përfunduar studimet e plota. Mediat polake raportuan se Jan R. dyshohet se ka marrë një diplomë MBA pa përfunduar asnjë studim dhe më pas e ka përdorur për të marrë një post të lartë në Bank Pocztowy, një degë e shërbimit postar shtetëror Poczta Polska.

Jan R. u ndalua të martën në Aeroportin Chopin të Varshavës dhe u dërgua për intervistim në Katovicë. Ai nuk ka pranuar fajin dhe përballet me disa akuza, përfshirë përdorimin e një dokumenti të falsifikuar. Ministria e Jashtme konfirmoi se ai është pezulluar përkohësisht deri sa të sqarohet e gjithë situata lidhur me kredencialet e tij.

Misioni diplomatik i Polonisë në Paris do të drejtohet tani nga Wiesław Tarka, një diplomat me përvojë të gjatë, i cili mban titullin e ambasadorit ad personam.

Rasti është pjesë e një hetimi më të gjerë mbi Collegium Humanum, tani i riemëruar si Varsovia University of Business and Applied Sciences. Hetuesit pretendojnë se që nga viti 2018, rektori i universitetit dhe disa punonjës kanë pranuar pagesa dhe përfitime personale në këmbim të diplomave që nuk përfaqësonin studimet reale.

Qindra zyrtarë shtetërorë dhe njerëz të lidhur me qeveritë aktuale dhe të mëparshme mbajnë diploma MBA nga ky institut. Muajin e kaluar, prokurorët polakë ngritën akuza ndaj 29 personave, përfshirë edhe kryetarin e qytetit të Wrocław, lidhur me këtë skandal.

Top Channel