Trump emëroi guvernatorin e Luizianës si të dërguar të posaçëm në Groenlandë, Landry: Do e bëj vendin pjesë të SHBA-së

Landry tha se do të shërbejë për të “bërë Groenlandën pjesë të SHBA-së,” duke ringjallur interesin e Trump për aneksimin e ishullit strategjik.

Në një postim në X (Twitter), guvernatori Landry e cilësoi këtë pozicion “vullnetar” dhe të nderuar, duke shtuar se Groenlanda është e rëndësishme për sigurinë kombëtare të SHBA-së.

Kjo ka nxitur reagime të forta nga autoritetet daneze dhe të Groenlandës, të cilët kanë kërkuar që integriteti territorial i Groenlandës të respektohet dhe se ishulli duhet të vendosë vetë për të ardhmen e tij.

Kryeministri i Groenlandës, Jens-Frederik Nielsen, tha se Groenlanda është e gatshme të bashkëpunojë me SHBA-në, por vetëm në baza të respektit të ndërsjellë. Ai e kundërshtoi idenë që Groenlanda të bëhet pjesë e SHBA-së, duke shtuar se “Groenlanda u përket banorëve të Groenlandës.”

Ministri i Jashtëm i Danimarkës, Lars Lokke Rasmussen, e përshkroi emërimin e Landry si “shqetësues” dhe kërkoi që SHBA të respektojë sovranitetin e Danimarkës, duke paralajmëruar se çdo veprim që dëmton integritetin territorial të mbretërisë nuk mund të pranohet.

Presidenti Trump ka pasur një interes të gjatë për Groenlandën, duke theksuar rëndësinë e saj strategjike dhe pasurinë e saj minerale. Në vitin 2019, ai provoi të blinte Groenlandën, por kjo ofertë u refuzua kategorikisht nga Kopenhageni. Tani, emërimi i Landry-t sugjeron që Trump mbetet i vendosur për të avancuar planet e tij për të pasur më shumë kontroll mbi ishullin.

Debati mbi Groenlandën vjen në një kohë kur konkurrenca strategjike në Arktik po rritet. Shkrirja e akullit po hap mundësi të reja për transportin detar dhe eksplorimin e burimeve minerale, duke i bërë vendet e Arktikut si Groenlanda një pikë të rëndësishme për sigurinë kombëtare dhe planifikimin ushtarak të SHBA-së dhe NATO-s.

Top Channel